खोज

बुटवल ।

बुटवल उद्योग वाणिज्य संघ रुपन्देहीले ७२ औं स्थापना दिवस मनाएको छ । सोही अवसरमा बोल्दै नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपाल प्रचुर सम्भावना भएको देश भएको बताएका छन् ।

उनले नेपालका स्रोत साधनलाई प्रभावकारी रूपमा उपयोग गर्न सके आर्थिक विकासको ठूलो सम्भावना रहने बताए । आन्तरिक पँुजी परिचालन गरी आर्थिक समृद्धि गर्न सकिने र त्यसवाट रोजगार सृजना गरी बैदेशिक रोजगारमा जाने युवाहरुको संख्या घटाउन सकिने बताए ।

उनले विशेष गरी कृषि, जलविद्युत्, पर्यटन र उत्पादनमूलक उद्योगमा लगानी बढाउन सके रोजगारी सिर्जना गर्दै देशलाई आत्मनिर्भर बनाउन सकिने बताए । “हाम्रो स्रोत साधनलाई सही रूपमा प्रयोग गर्न सकियो भने आर्थिक समृद्धि असम्भव छैन”–उनले भने । नेपालमा अधिक मात्रामा सम्भावना छ भनेर प्रचार गर्नपनि जरुरी रहेको बताउदै ढकालले अगामी दिनमा संघले गर्ने सामाजिक, आर्थिक, स्वास्थ्य, शिक्षा लगायत सबै बिषयमा संघसँग निरन्तर सहकार्यमा प्रतिबद्ध रहेको बताए ।

कार्यक्रममा बुटवल उद्योग वाणिज्य संघ रुपन्देहीका अध्यक्ष हरिप्रसाद अर्यालले संघको स्थापनाकालदेखि आर्थिक, सामाजिक र भौतिक विकासमा महत्वपूर्ण भूमिका रहेको जानकारी गराए । उनले संघका गतिबिधि दस्ताबेजीकरणका लागि पनि पत्रकारहरुसँग समन्वय र सहकार्य गरी अगाडि बढ्ने बताए ।

अर्यालले बिगतमा बिभिन्न कारण आर्थिक संकटमा परेका उद्योगहरुलाई सञ्चालनमा ल्याउन तिनै तहको सरकारसँग आवश्यक समन्वय गर्ने बताए । उनका अनुसार, संघले शिक्षाका क्षेत्रमा लुम्बिनी वाणिज्य क्याम्पस, सिद्धार्थ गौतमबुद्ध क्याम्पस, तथा बुटवल बहुमुखी क्याम्पसको विज्ञान भवन निर्माणमा सहयोग गरेको छ । स्वास्थ्य क्षेत्रमा आम्दा अस्पताल तथा लुम्बिनी प्रादेशिक अस्पतालको प्रसुति भवन निर्माणमा पनि संघले लगानी गरेको छ ।

बुटवल उपमहानगरपालिकाका नगरप्रमुख खेलराज पाण्डेयले संघको गौरवमय इतिहास रहेको उल्लेख गर्दै यसले उद्योग व्यवसाय प्रवद्र्धन तथा स्थानीय आर्थिक तथा सामाजिक विकासमा उल्लेखनीय योगदान पुर्याएको बताए । उनले पछिल्लो समय बुटवलमा विज्ञापन बोर्ड करबारे विवाद उत्पन्न भएको जानकारी दिँदै यदि मापदण्डभन्दा बढी शुल्क लिइएको भए कारबाही गरिने बताए ।

त्यस्तै, नगरपालिकाका उपप्रमुख सावित्रादेवी अर्यालले राजस्व परामर्श समितिको सुझाव अनुसार मात्र करसम्बन्धी निर्णय लिइने बताउँदै यस्ता विषयमा छलफल तथा सुधार गर्न तयार रहेको बताइन् ।

संस्थापक पूर्वअध्यक्ष कुशप्रसाद मल्लीलाई संघको उन्नयनमा उल्लेखनीय योगदान पुर्याएको भन्दै सम्मान गरिएको थियो । सम्मान ग्रहण गर्दै उनले व्यवसाय प्रवद्र्धन र आर्थिक विकासबिना मुलुक समृद्ध हुन नसक्ने बताए । संघको स्थापना दिवसकै अवसरमा मानव सेवा आश्रमलाई ५१ हजार रुपैयाँ आर्थिक सहयोग प्रदान गरिएको थियो । साथै, औद्योगिक व्यापार मेलामा विशेष योगदान दिने फरक क्षमताका भरतराज केसी र डिल्लीराज कंडेललाई सम्मान गरिएको थियो ।

त्यसै अवसरमा लुम्बिनी वाणिज्य क्याम्पसले औद्योगिक व्यापार मेलाबारे अध्ययन गरेको प्रतिवेदन संघलाई हस्तान्तरण गरेको महासचिव मुक्तिप्रसाद अधिकारीले जानकारी गराएका थिए । कार्यक्रममा इलाका प्रशासन कार्यालय बुटवलका प्रमुख रामचन्द्र अर्याल, सिद्धार्थनगर उद्योग वाणिज्य संघका अध्यक्ष ठाकुरप्रसाद श्रेष्ठ, नेपाल पत्रकार महासंघ रुपन्देहीका अध्यक्ष दिनेश पाण्डे, संघका वरिष्ठ उपाध्यक्ष टंकप्रसाद गैरे लगायतका व्यक्तिहरूले शुभकामना व्यक्त गरे।

संघका पदाधिकारीहरूले निजी क्षेत्र र सरकारबीच सहकार्यलाई थप मजबुत बनाउनुपर्नेमा जोड दिएका छन् । कार्यक्रमका वक्ताहरूले नेपालमा लगानीका प्रशस्त सम्भावनाहरू भए पनि लगानीकर्तालाई आकर्षित गर्ने नीति आवश्यक रहेको धारणा राखेका थिए ।