दाङ, १० फागुन ।
प्रथम शहीद लखन थापा मगर कप फुटबलको उपाधि चौघेरा स्पोर्ट्स एकेडेमीले जितेको छ ।
नेपाल मगर संघ घोराही नगर समितिको आयोजनामा नेपालका प्रथम शहीद लखन थापा मगरको १४८औँ स्मृतिमा घोराहीमा शनिबार भएको फाईनलमा बिएफएललाई २–० गोलले पराजित गर्दै चौघेरा स्पोर्ट्स एकेडेमीले उपाधि उचालेको हो ।
घोराही उपमहानगरपालिका वडा नम्बर १८ नवलपुर फुटबल मैदानमा भएको फाईनल खेलमा पहिलो हाफ गोलरहित भएपनि दोस्रो हाफमा चौघेरा स्पोर्ट्स एकेडेमीले २ गोल गर्दै उपाधि उचालेको हो । टीमलाई जीत दिलाउन दुवै गोल सागर पुनले गरे ।
बिएफएलले पाएको मौकालाई गोलमा परिणत गर्न नसक्दा हार व्यहोर्दै उपविजेता बनेको छ । बिएफएलका खेलाडीले प्रहार गरेको बल बार र पोष्टमा लागेर चार पटक फर्किएको थियो ।
प्रतियोगितामा विजेता बनेको चौघेरा स्पोर्ट्स एकेडेमीले नगद १ लाखसहित शिल्ड, मेडल र प्रमाण पत्र पाउने छ भने उपविजेता भएको बिएफएलले पनि नगद पचास हजार नगदसहित शिल्ड, मेडल र प्रमाणपत्र पुरस्कार मगर दिवसका दिन फागुन १५ गते प्रदान गरिने प्रतियोगिता सहसंयोजक अशोक घर्तीले जनाए । यसैगरी विधागत उत्कृष्ट खेलाडीलाई पनि उक्त दिन पुरस्कृत गरिने आयोजकको भनाई छ ।
टीमलाई जीत दिलाउन महत्वपूर्ण भुमिका खेल्नुभएका चौघेरा स्पोर्ट्स एकेडेमीका सागर पुन प्लेयर अफ द म्याच भए ।
यसअघि चौघेरा स्पोर्ट्स एकेडेमीले युएनबीसीलाई ४–१ गोल अन्तरले तथा दोस्रो सेमीफाईनलमा बिएफएलले नवलपुर फुटबल एकेडेमीलाई १–० गोलले हराउँदै फाईनलमा प्रवेश गरेका थिए ।
प्रतियोगितामा दाङसहित सल्यान, रोल्पाका गरी कुल १६ टीमको सहभागीता रहेको संयोजक घर्तीले बताए ।
शहीद थापा मगरको स्मृति दिवसको अवसरमा हरेक वर्ष फुटबल प्रतियोगिताको आयोजना गर्दै आइरहेको भन्दै आयोजक नेपाल मगर संघले खेलकुदको विकाससँगै शहीदको सम्मानका लागि कार्यक्रम आयोजना गरेको जनाएको छ । अब फागुन १५ गते मगर दिवसका अवसरमा नेपाल संघ जिल्ला समन्वय समितिको परिसरमा एक समारोह बीच खेलाडीहरुलाई पुरस्कृत गरिने कार्यक्रम रहेको आयोजकले जनाएको छ ।
२४ मंसिर २०८२, बुधबार
