खोज

बुटवल,१० फागुन ।
बिद्यालयमा शैक्षिक बिकास र सुधारका लागि भरोषा योग्य कार्यक्रम संचालन गर्ने उद्देश्यसहित लुम्बिनी प्रदेशमा ‘मेरो विद्यालय मेरो दायित्व अभियान’ २०८१ को शुभारम्भ भएको छ । सार्वजनिक शिक्षाको साखलाई आम अभिभावक, विद्यार्थी तथा सरोकारवालाको भरोसा र विश्वासको केन्द्रको रूपमा स्थापित गर्न ‘मेरो विद्यालय मेरो दायित्व अभियान’ संचालन गरिएको हो ।
आज लुम्बिनी प्रदेशका सबै जिल्लामा एकैसाथ शुरु गरिएको सो अभियान सफल पार्न लुम्बिनी प्रदेश सरकार, सामाजिक बिकास मन्त्रालयले आफ्नो स्थान र संस्था मार्फत योगदान गर्न सबैलाई हार्दिक अपिल समेत गरेको छ । साथै सरोकारवाला सबैको सक्रिय सहभागिताका लागि समेत मन्त्रालयले आग्रह गरेको छ । समुन्नत नेपालको निर्माणका लागि शैक्षिक लहर ल्याएका विद्यालयहरूलाई पूर्ण सिकाई केन्द्रको रूपमा स्थापित गर्नु मुख्य उद्देश्य रहेको सामाजिक बिकास मन्त्रालयले जनाएको छ ।

बुटवल ५ स्थित ज्ञानोदय माध्यमिक विद्यालयमा सो अभियानको शुभारम्भ गर्दै लुम्बिनी प्रदेशसभा सदस्य तथा नेपाली काँग्रेसका प्रमुख सचेतक जमुना ढकालले विद्यालय शिक्षालाई अन्तराष्ट्रिय स्तरमा प्रतिष्पर्धा गर्नसक्ने गुणस्तरको बनाउनु पर्ने कुरामा जोड दिईन । बिद्यालयको गुणस्तर बृद्धिसँगै शैक्षिक क्षेत्रको विकास गरी आम अभिभावक, विद्यार्थी र सरोकारवालाको आशा र भरोसाको केन्द्रको रूपमा स्थापित गर्नुपर्ने धारणा ब्यक्त गर्दै प्रमुख सचेतक ढकालले शैक्षिक गुणस्तर र समावेशिता अभिबृद्धि गर्ने उद्देश्यसहित यो अभियान आएको जानकारी गराईन ।

ज्ञानोदय मा.बि. ब्यबस्थापन समितिका अध्यक्ष रामबहादुर कार्कीको सभापतित्वमा सन्पन्न सो कार्यक्रममा बुटवलका पूर्व नगरप्रमुख पुनाराम पोखरेल, नेपाल शिक्षक संघ प्रदेश अध्यक्ष लालप्रसाद पंगेनी, सामाजिक बिकास मन्त्रालयका उपसचिव नारायण प्रसाद पोखरेल, शिक्षा समन्वय ईकाई रूपन्देहीका प्रमुख माधव बन्जाडे, बुटवल उपमहानगर नगर शिक्षा शाखा प्रमुख टिकाराम पन्थी, बिद्यालयका प्रधानाध्यापक टिकाराम शर्मा, पूर्व बिद्यार्थी शिव ज्ञवाली, शिक्षिका पुष्पा खनाल लगायतले शैक्षिक क्षेत्रमा सरोकारवालाहरूको सकारात्मक भूमीका र सहयोगमा सामुदायिक विद्यालयको खस्कँदो स्तरलाई क्रमशः सुधार गरी हाम्रो विद्यालय राम्रो विद्यालय बनाउनु पर्ने बताएका थिए ।