खोज

रौतहट, ९ फागुन ।

भारतीय सीमा सुरक्षा बल (एसएसबी) का जवानले गरेको ज्यादतीका कारण सर्लाहीका एक युवकले खुट्टा गुमाउनु परेको घटना सार्वजनिक भएको छ।सर्लाही जिल्लाका बलरा नगरपालिका-३ का महेन्द्र रायको १८ वर्षीय छोरा गोलु राय यादवलाई एसएसबीका जवानले अन्धाधुन्ध लाठी प्रहार गर्दा खुट्टा गुमाउनु परेको हो।

गोलु राय यादव ३ दिनअघि, माघ ७ गते मंगलवार बिहान ११ बजे सिमावर्ती भारतीय बजार बसविट्टा बाट घरायसी सामान जस्तै चामल र चिनी किनेर मोटरसाइकलमा घर फर्किरहेका थिए। सोही क्रममा एसएसबीका जवानहरूले सामान चेकजाँच गर्नका लागि उनकाे मोटरसाइकल रोक्न प्रयास गरे। तर, तिव्र गतिको कारण गोलु रोकिएनन्, र एसएसबीका जवानहरूले अन्धाधुन्ध लाठी प्रहार गरेका थिए। प्रत्यक्षदर्शीका अनुसार, जवानहरूले गोलुलाई लखेट्दै नेपाली भूमिमा प्रवेश गरेका थिए र त्यसपछि गोलु मोटरसाइकलसहित लडेका थिए।

लडेर खुट्टा भाँचिएको अवस्थामा पनि एसएसबीले लाठी प्रहार जारी राखेका थिए, र त्यसपछि स्थानीयहरूको होहल्ला गरेपछि जवानहरू भारतीय भूमितर्फ भागेका थिए। स्थानीयले घटना थाहा पाएपछि गोलुलाई उपचारका लागि तुरुन्तै एम्बुलेन्समा बिरगञ्ज लगियो, तर त्यहाँ उपचार सम्भव नभएको भन्दै डाक्टरले ललितपुरको बी एण्ड वी अस्पतालमा पठाए।

वहाँ गरिएको चेकजाँचमा, डाक्टरहरूले खुट्टाको भास्कुलर नसा च्यापिएर गम्भीर अवस्थामा रहेको देखे र त्यसका कारण गोलुको दाहिने खुट्टा काट्नु परेको महेन्द्र राय यादवले बताउनुभयो।

गोलुको हाल उपचार जारी रहेको र पीडित परिवारले एसएसबीका जवानहरूको ज्यादतीको अनुसन्धान र कार्वाहीको माग गरेका छन्।

सर्लाहीका जिल्ला प्रहरी कार्यालयका प्रवक्ता डिएसपी सरोज राईले उक्त घटनाको पुष्टी गरेका छन्। उनले भने, “घटनाबारे मौखिक जानकारी आएको छ, तर औपचारिक रुपमा लिखित जानकारी प्राप्त भएको छैन र थप अनुसन्धान भइरहेको छ।”

एसएसबीको ७१ औं बटालियनका भ्वाईस कमान्डेन्ट विश्वजित तिवारीले भने, “नेपाली युवक मोटरसाइकल दुर्घटनामा परेको र खुट्टा भाँचिएको जानकारी प्राप्त भएको छ। उक्त घटना एसएसबीका २० औं बटालियन खटिएको क्षेत्रमा भएको हो, जवानको ज्यादती हो कि होइन भनेर अनुसन्धान जारी छ।”