खोज

बुटवल, ०९ फागुन।

ठूला सवारी साधनहरूभन्दा साना सवारी साधनहरूको दुर्घटनाको संख्या बढी रहेको पाइएको छ। विशेष गरेर दुईपाङ्ग्रे सवारी साधन मोटरसाइकल र स्कुटरको दुर्घटना चारपाङ्ग्रेको तुलनामा दोब्बर बढी पाइएको हो। दुर्घटना रोकथामका लागि ट्राफिक प्रहरी मात्रै नभई सबैले ध्यान दिनुपर्नेमा जोड दिइएको छ।

नेपाल प्रहरी राजमार्ग सुरक्षा ट्राफिक व्यवस्थापन कार्यालय बुटवलले हालै सार्वजनिक गरेको दुर्घटनाको तथ्यांक केलाउँदा लुम्बिनी प्रदेशमा गत वर्षको माघ महिनामा भन्दा गएको माघ महिनामा दुर्घटनाको संख्या धेरै रहेको देखिन्छ। गत वर्षको माघ महिनामा लुम्बिनी प्रदेशमा ७३ वटा सवारी दुर्घटना भएकोमा ३७ जनाको मृत्यु भएको थियो। दुर्घटनामा ९५ जना घाइते भएका थिए। तर, गएको माघ महिनामा भने दुर्घटनाको संख्या बढेर ३८५ पुगेको छ। दुर्घटनामा परेर ४२ जनाको मृत्यु भएको छ भने ५७० जना घाइते भएको प्रहरी रिपोर्टमा देखिन्छ।

यसरी दुर्घटनाको संख्या बढ्नु दुखद कुरा भएको भन्दै राजमार्ग सुरक्षा तथा ट्राफिक व्यवस्थापन कार्यालय बुटवलका प्रमुख प्रहरी उपरीक्षक श्याम बहादुर खत्रीले भने दुर्घटना कम गर्न एक्लो ट्राफिक मात्रले सम्भव नहुने उनको भनाइ छ। दुर्घटना कम गर्न जुनसुकै सवारी साधन चलाउने चालकहरू, सहचालकहरू, ट्राफिक प्रहरी, सडकको अवस्था सुधार, पैदल यात्री सबै पक्ष सचेत भएमात्र दुर्घटना कम गर्न सकिने प्रमुख खत्रीको भनाइ छ।

लुम्बिनी प्रदेशभरि ट्राफिक प्रहरी कार्यालयहरूले गएको एक महिना माघ महिनामा ट्राफिक नियम विपरीत सवारी चलाउने १५ हजार ५ सय ६२ सवारी साधनहरूलाई कारबाही गरी कुल १ करोड ५६ लाख ५ हजार जरीवाना गरी राजस्व जम्मा गरेको छ।

त्यस्तै विभिन्न यातायात व्यवसायी संघसंस्था क्लबहरू सँग मिलेर दुर्घटना कम गर्ने उद्देश्यले प्रदेशभरि १५ सय २० वटा जनचेतनामूलक कार्यक्रम समेत गरिएको छ। सवारी नियम विपरीत सार्वजनिक सवारी साधनहरूमा आफूखुसी १७ वटा सवारी साधनहरूलाई स्वरूप परिवर्तन गरी ध्वनि प्रदूषण गराउँदै हिँड्ने ३९ वटा मोटरसाइकलहरूलाई कारबाही स्वरूप जनही १० हजारका दरले जरीवाना गरी दुरुस्त गराइ छाडिएको नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका सूचना अधिकारी मधुसुधन न्यौपानेले बताए।

पछिल्लो समय दुईपाङ्ग्रे सवारी साधन मोटरसाइकलबाट धेरै दुर्घटना भैरहेको भन्दै मोटरसाइकल चालकसँग २ मिनेट भन्ने कार्यक्रम सञ्चालन गरी १३ हजार ३ सय ४७ जना चालकहरूलाई दुर्घटनाका कारण बारे जानकारी गराइएको सूचना अधिकारी न्यौपानेको भनाइ छ। प्रदेशका विभिन्न ट्राफिक प्रहरी कार्यालयमा सेवाग्राहीलाई छिटो छरितो सेवा दिने र गलत गरेका चालकहरूको रेकर्ड राख्ने सेवा समेत सुरु गरिएको हो।