खोज

देउखुरी, ०९ फागुन ।
लुम्बिनी प्रदेशमा सामुदायिक विद्यालयहरूको शैक्षिक सुधार तथा पूर्वविद्यार्थीहरूको सक्रिय सहभागिता सुनिश्चित गर्न ‘मेरो विद्यालय, मेरो दायित्व’ अभियान सुरू हुने भएको छ । सामाजिक विकास मन्त्रालयले प्रदेशका सबै विद्यालयमा अध्ययन गरेका पूर्वविद्यार्थीको ज्ञान, सीप र लगानीको सदुपयोग गर्ने उद्देश्यसहित यो अभियान सञ्चालन गर्न लागेको हो ।
मुख्यमन्त्री चेतनारायण आचार्यले आगामी शुक्रबार अर्घाखाँचीको अर्घा रजस्थल माध्यमिक विद्यालयबाट अभियानको औपचारिक शुभारम्भ गर्ने कार्यक्रम रहेको छ । एकैसाथ १५ विद्यालयबाट अभियान सुरू गरिंदैछ । मुख्यमन्त्री आचार्यले भने, “सामुदायिक विद्यालयको शैक्षिक गुणस्तर अभिवृद्धि गर्न यो अभियान अपरिहार्य छ । ७० प्रतिशत बालबालिकाले रोजाइमा राख्ने सामुदायिक विद्यालयप्रति अझै विश्वास र भरोसा बढाउनु आवश्यक छ ।”

प्रदेश सरकारको नीति तथा कार्यक्रम अन्तर्गत सामुदायिक विद्यालयप्रति सरोकारवालाहरूको उत्तरदायित्व वृद्धि गर्न यो अभियान समावेश गरिएको सामाजिक विकास मन्त्री जन्मजय तिमिल्सिनाले जानकारी दिए । यो अभियान विशेष गरी कमजोर शैक्षिक नतिजा भएका सामुदायिक विद्यालयहरूलाई सुधार गर्ने लक्ष्यका साथ अघि बढाइएको छ । २०८० सालको एसईई परीक्षामा लुम्बिनी प्रदेशको नतिजा राष्ट्रिय औसतभन्दा कमजोर देखिएपछि सुधारका लागि यो अभियान थालिएको हो । प्रदेशका कुल ६,३४० विद्यालयमध्ये ४,५३१ सामुदायिक विद्यालय छन्, जसमा ९,२५,६२९ विद्यार्थी अध्ययनरत छन् ।
सामुदायिक विद्यालयहरूको प्रभावकारिता बढाउन निम्न गतिविधि सञ्चालन गरिनेछ विद्यालय व्यवस्थापनमा सुधार, पूर्वविद्यार्थीहरूको सहभागिता अभिवृद्धि, भौतिक पूर्वाधार तथा स्रोतसाधन परिचालन, शिक्षामा सूचना प्रविधिको उपयोग, छात्रवृत्ति कोष स्थापनासहित विभिन्न शैक्षिक कार्यक्रमखेलकुद तथा अतिरिक्त क्रियाकलाप प्रवद्र्धन गरिने बताए । त्यसै गर सामाजिक विकृतिविरुद्ध सचेतना कार्यक्रम, विपत् व्यवस्थापन तथा स्वास्थ्य, पोषण, खोप र जीवनोपयोगी सीपसम्बन्धी जानकारी अभियान गरिने मुख्यमन्त्री आचार्यले बताए ।

लुम्बिनी प्रदेशका पाँच उत्कृष्ट सामुदायिक विद्यालयहरूको सफल अभ्यासलाई बिस्तार गर्दै अन्य विद्यालयहरूको स्तरवृद्धि गर्ने लक्ष्य राखिएको छ । यस अभियानमा पूर्वविद्यार्थी, अभिभावक, शिक्षक, पालिका प्रतिनिधि, प्रदेशसभा सदस्य, नागरिक समाजका अगुवा तथा सञ्चारकर्मीहरूको सहभागिता रहनेछ ।