खोज

भैरहवा ।

रूपन्देही जिल्लाको रोहिणी गाउंपालिकामा वडा अध्यक्ष र शिक्षा शाखा प्रमुख बिचमा भएको द्वन्द्वले कामकाज ठप्प भएको छ । यता कर्मचारीको आन्दोलनलाई गाउंपालिका अध्यक्ष विद्या यादवले साथ दिएका छन् ।

पालिका अध्यक्ष नै कर्मचारी पीडित भएको र वडा अध्यक्षले कर्मचारीलाई भौतिक आक्रमण गर्नु निन्दनीय भएको भन्दै अध्यक्षलाई कारबाहीको माग गरेका छन् ।

रुपन्देहीको रोहिणी गाउँपालिकाका शिक्षा शाखा प्रमुख मधु प्रसाद घिमिरेमाथि आक्रमण गर्ने वडाअध्यक्षलाई कारवाहीको माग गरिएको छ ।

कार्यपालिकाको बैठकमा आवश्यक राय÷सल्लाह माग गर्न आमन्त्रण गरिएका राष्ट्रसेवक कर्मचारीमाथि भौतिक आक्रमण गर्नु र समग्र कर्मचारी वर्गकै मनोबल गिर्ने गरी कानूनविपरीत कार्यालय परिसरमै आक्रमण गरी घाइते बनाउने रोहिणी–२ का वडाअध्यक्ष करम हुसेन खानलाई आवश्यक कारवाही गर्न माग गरिएको हो ।

गाउँपालिकाका अध्यक्ष विद्या प्रसाद यादवले विज्ञप्ती जारी गर्दै रोहिणी गाउँपालिकाको यही फागुन ५ गतेको कार्यपालिका बैठकमा छलफलको क्रममा गाउँपालिकाका शाखा अधिकृत, अधिकृतस्तर आठौं तह शिक्षा शाखामा कार्यरत मधु प्रसाद घिमिरेले आफ्ना विचार प्रस्तुत गर्ने सन्दर्भमा वडाअध्यक्ष खानले भौतिक रुपमा आक्रमण गरी गालीगलौज, अपशब्द र अभद्र व्यवहार गरेको हुँदा यसले समग्र रोहिणी गाउँपालिकाको कार्यवातावरणमा नकारात्मक असर परेको उल्लेख गरेका छन् ।

‘निज करम हुसेज खानका गतिविधिहरु विगतमा पनि अमर्यादित रहँदै आएको कुरा गत वर्ष आर्थिक प्रशासन शाखामा अभद्र व्यवहार गरी आर्थिक प्रशासन बन्द गर्ने र गाउँ कार्यपालिकामा कुर्सी तथा टेबल फोरी सार्वजनिक सम्पत्तिको हानी नोक्सानी गरेको घटनाबाट पनि प्रष्ट हुन आउँछ’ विज्ञप्तीमा भनिएको छ–‘आर्थिक वर्ष २०८०–०८१ को अन्त्यमा असारको २३ गते प्राविधिक शाखामा काम गरिरहेका कर्मचारीहरुमाथि ज्यान मार्ने उद्योगले हातपात गर्दा निजहरु भागेर बचेको समेत उदाहरणहरु रहेका छन् ।’

‘जनताको अमूल्य मतद्वारा चुनिएका जनप्रतिनिधिले राष्ट्रसेवक कर्मचारीको सहयोगले जनतालाई सरल, सहज र सुरक्षित वातावरणमा सेवा प्रवाह गर्नुपर्नेमा कानूनको बर्खिलाप यी र यस्तै क्रियाकलाप गर्दा राष्ट्रसेवक कर्मचारीले तटस्थ ढंगले सेवा प्रवाह गर्न असहज महसुस गर्ने, जनता तोकिएको सेवाबाट वञ्चित हुनुपर्ने बाध्यता रहने हुँदा यी र यस्तै गैरकानूनी क्रियाकलापमा संलग्न हरकोहीलाई कानूनी दायरामा ल्याइ शान्त र भयरहित वातावरणमा सार्वजनिक सेवा प्रवाह गर्ने वातावरण मिलाइदिनुहुन सम्बन्धित सबै पक्षसँग अनुरोध गर्दछौं, ’विज्ञप्तीमा भनिएको छ ।