खोज

चन्द्रौटा (कपिलवस्तु), ६ फागुन ।
कपिलवस्तुको शिवराज नगरपालिका वडा नम्बर ३ ले वडालाई खरको छानो मुक्त बनाउने योजना अघि सारेको छ । विगतका वर्ष जस्तै यस बर्ष पनि वडा कार्यालयको गौरवको योजना कार्यक्रम अन्तर्गत १५ लाख बजेट विनियोजन गरी खरको छानोमुक्त बनाउने योजना अघि सारेको हो ।
वडा भित्रका ४५ जना गरिब विपन्न घरपरिवारलाई जस्तापाता वितरण गरी खरको छानो मुक्त गराउन योजना ल्याएको वडा अध्यक्ष टेकलाल सापकोटाले बताए । खरको छानोले बर्षेनि नागरिक मर्कामा पनुको साथै आगलागीका घटना न्यूनीकरण गर्न यसले अत्यन्तै महत्वपूर्ण भूमिका खेल्ने उनले जनाए । “यो योजना वडा कार्यालयको गौरवको योजना हो ।” वडा अध्यक्ष सापकोटाले भने ।

नगरपालिकामा वडाका कतिपय घरधुरी अझै पनि खरको छानोमै आश्रित छन् । उनले भने “विगतमा हरेक वर्ष आगलागी तथा मौसमजन्य समस्याबाट ठूलो जोखिम बेहोर्नुपरेको थियो ।’ यो योजना लागू भएसँगै स्थानीय बासिन्दाले सुरक्षित आवास प्राप्त गर्ने उनको भनाइ छ ।
खरको छानो हटाउने अभियानले नगरवासीलाई सुरक्षित मात्र होइन, वातावरणीय दृष्टिकोणले पनि लाभ पु¥याउने वडा सदस्य श्यामलाल थारुले बताए । उनका अनुसार यस योजनाले नगरको विकासमा सकारात्मक प्रभाव पार्ने विश्वास गरिएको छ । शिवराज नगरपालिकाका उपमेयर शिवकुमारी थारुले यस योजनाको प्रशंसा गर्दै अन्य वडाहरूलाई पनि यस्ता कार्यक्रम ल्याउन आवश्य रहेको बताउँछिन् । आमनागरिकहरूले प्रत्यक्ष लाभ हुने विश्वास व्यक्त गर्दै जनतामा उत्साह थपिएको उनले जनाइन् ।

भितरियाका गाउँका स्थानीय बुधराम थारुले भने– “छानो हरेक वर्ष हावाहुरीले उडाउँथ्यो । अब जस्तापाता पाएपछि धेरै सुरक्षित महसुस हुने भयो ।” नगरपालिकाका अन्य वडाहरूले पनि यस्तै योजनाहरू लागू गरेमा सम्पूर्ण शिवराज नगरपालिका खरको छानोमुक्त बन्न सक्ने अनुमान गरिएको छ । योजनाका लाभार्थी परिवारले यसलाई निकै सकारात्मक रूपमा लिएका छन् । वडा कार्यालयले यस योजनालाई निरन्तरता दिने र आगामी वर्ष थप परिवारलाई समेट्ने प्रतिबद्धता जनाएको छ ।