खोज

रोल्पा, ५ फागुन
रोल्पामा राष्ट्रिय स्तरको भलिबल प्रतियोगिता हुने भएको छ । सनस्टार युवा क्लव नामक गैर सरकारी संस्थाले सो प्रतियोगिता आयोजना गर्न लागेको हो । प्रतियोगिता यही फागुन १० देखि १४ गतेसम्म सदरमुकाम लिवाङमा आयोजना हुन लागेको हो । प्रतियोगितामा विजेता टिमले ५ लाख रूपैयाँसहित सन–स्टार ट्रफी जित्नेछन । उपविजेताले २ लाख ५० हजार र तेस्रो हुनेले १ लाख रूपैयाँ जित्नेछन । सान्त्वना हुने टिमलाई ५० हजार प्रदान गरिनेछ । उत्कृष्ट खेलाडी, स्पाइकर, ब्लकर, सेटर, डिफेन्डरलगायत विधागत उत्कृष्टलाई पनि नगद पुरस्कार प्रदान गरिने सन स्टार युवा क्लव रोल्पाका अध्यक्ष पूर्ण केसीले जानकारी दिए  ।

क्लबको १३ औँ वार्षिकोत्सवको अवसरमा सरकारद्वारा राष्ट्रिय खेलको मान्यता प्रदान गरेको भलिबल प्रतियोगिता आयोजना गर्न लागेको आयोजकको भनाई छ । प्रतियोगितामा ३ विभागीय टीम, ७ वटा प्रदेश टिम र आयोजक गरी ११ वटा टीमको उपस्थिति रहने आयोजकको भनाई छ । क्लवले करिब १० वर्षअघि पहिलो संस्करणको रूपमा राष्ट्रिय स्तरको भलिवल प्रतियोगिता आयोजना गरेको थियो । यो उसको दोश्रो संस्करण हो ।

सोही अवसरमा जिल्लास्तरीय खुला महिला भलिबल प्रतियोगिता समेत आयोजना हुने वताइएको छ ।। स्थानीय तह वीच प्रतिस्पर्धा हुने सो प्रतियोगितामा स्थानीय तहको सिफारिसमा सहभागी महिला टोलीबीच प्रतिस्पर्धा हुनेछ । सो प्रतियोगितामा विजेता टिमले ५५ हजार नगद पुरस्कार प्राप्त गर्नेछन । उपविजेता टिमलाई ३५ हजार, तेस्रो हुने टिमलाई १५ हजार र चौंथो हुने टिमलाई १० हजार रूपैयाँ नगद पुरस्कार प्रदान गरिने आयोजकको भनाई छ । सो अवसरमा विभिन्न सांस्कृति कार्यक्रमका साथमा राष्ट्रिय स्तरको खेलको आयोजना गरिन लागेपछि रोल्पाका खेलाडीहरूमा उत्साह देखिएको छ ।

‘रोल्पाको पर्यटन तथा खेलकुद विकासका लागि’ भन्ने नारा दिइएको प्रतियोगिताले जिल्लाको खेलकुद र पर्यटन क्षेत्रको विकासमा टेवा पुग्ने आयोजकले अपेक्षा गरेको छ । यस कार्यक्रमबाट रोल्पाको विभिन्न पर्यटकीय क्षेत्रको प्रचार प्रसार हुने अपेक्षा गरेका छौ क्लवका अध्यक्ष पूर्ण केसीले भने । गैर सरकारी स्तरबाट आयोजना गरिएको यस्तो बृहत खेलकुदमा जिल्लाका सबै राजनैतिक दलहरू,जनप्रतिनिधिहरू, स्थानीय सरकार, प्रदेश सरकार, संघीय सरकार एवं रोल्पा स्थित सबै व्यवसायीहरू, स्वदेश तथा विदेशमा रोजगारीमा रहेर काम गर्ने व्यक्तित्वहरूबाट आर्थिक, भौतिक तथा नैतिक सहयोग प्राप्त भईरहेको अध्यक्ष केसीको भनाई छ ।