खोज

गुल्मी, ०३ फागुन ।
जिल्ला सदरमुकाम तम्घासस्थित गुल्मी अस्पतालमा विद्युतिय चिकित्सा अभिलेख प्रणाली सुरु गरिएको छ । विश्व स्वास्थ्य संगठनद्वारा लुम्बिनी प्रदेश अन्तर्गत गुल्मी अस्पतालमा पहिलो पटक उक्त अभिलेख प्रणाली सुरु गरिएको हो । विद्युतिय चिकित्सा अभिलेख प्रणाली सुरु भएसँगै अस्पतालबाट उपलब्ध हुने सबै प्रकारका सेवा डिजिटल प्रबिधिको माध्यममा स्पष्ट देखिने भएको छ । विश्व स्वास्थ्य संगठन नेपालका डा.एलीसन गोकोटना र लुम्बिनी प्रदेशका स्वास्थ्यमन्त्री खेमबहादुर सारुले गुल्मी अस्पताललाई एक कार्यक्रमका बिच उक्त सामग्रि हस्तान्तरण गरेका हुन ।
विद्युतिय चिकित्सा अभिलेख प्रणाली सुुरु गर्दै विश्व स्वास्थ्य संगठन नेपालका डा. गोकोटनाले यो सेवाबाट नागरिकलाई धेरै सहजता पुराउने भन्दै जिल्लावासीहरूले यसको अधिकतम प्रयोग गरेर सेवालिन आग्रह गरेका छन । यस अभिलेख प्रणालीबाट बिलिङ्, टिकटिङ्, डाक्टरको उपलब्धता, औषधी लगायत विवरण अभिलेख प्रणाली मार्फत जानकारी पाउन सकिने अस्पतालका निमित्त कार्यालय प्रमुख बैभव बस्यालले जानकारी दिए । यसबाट बिरामीहरूलाई बिगतदेखि वर्तमानसम्मका बिवरण सहजै रूपमा उपलब्ध हुने बताईएको छ ।

विद्युतिय चिकित्सा अभिलेख प्रणालीको शुभारम्भ गर्दै लुम्बिनी प्रदेश सरकारका स्वास्थ्यमन्त्री खेमबहादुर सारुले यो सेवा सुचारुभएसँगै बिरामीलाई कागजी प्रक्रियाको झन्झट नहुने बताए । उनले स्वास्थ्य मन्त्रालय मातहतमा रहेका सबै सवारी साधनहरूमा जिपीएस जडान गर्ने, शुल्क सहितको नागरिक वडापत्र राख्ने,सरकारी अस्पतालमा काम गर्ने डाक्टरहरूको नाम देखिने गरि राख्ने लगायतका कामहरू सुुरु गरेको जानकारी गराए ।विश्व स्वास्थ्य संगठन नेपालका अधिकृत सुदन ज्ञवालीले विद्युतिय चिकित्सा अभिलेख प्रणाली मार्फत बिरामीको समय, खर्चको बचत हुनुका साथै परीक्षणमाहुने दोहोरोपनको अन्त्यका अतिरिक्त स्वास्थ्य सम्बन्धी नीति निर्माणमा एकीकृत तथ्याङ्क प्राप्तहुने बताए । यसबाट सेवा प्रवाह द्रुत, चुस्त र प्रभावकारी हुने उनको भनाई छ । यो प्रणाली सुरु गर्नेमा गुल्मी अस्पताल लुम्बिनी प्रदेशमा पहिलो हो । ५० शैया रहेको गुल्मी अस्पतालमा अर्घाखाँची, प्यूठान, बाग्लुङ्ग, लगायतका जिल्लाका नागरिकहरूले सेवालिँदै आईरहेका छन ।