दाङ, २ फागुन ।
नेपालका प्रथम सहिद लखन थापा मगरको १४८औँ स्मृतिमा आयोजित फुटबल प्रतियोगिता–२०८१ मा माडीचौर फुटबल क्लब रोल्पाले विजयी शुरुवात गरेको छ ।
नेपाल मगर संघ घोराही नगर समितिको आयोजनामा शुक्रबारदेखि घोराही उपमहानगरपालिका वडा नम्बर १८ नवलपुर फुटबल मैदानमा शुरु भएको खुल्ला नकआउट प्रतियोगितामा सल्यान फुटबल क्लवलाई ६–२ गोल अन्तरले हराउँदै विजयी शुरुवात गरेको हो । प्रतियोगितामा माडीचौर एफसीका प्रतिक घर्ती मगर प्लेयर अफ द म्याच भए । प्रतियोगिताको उदघाटन नेपाल मगर संघका केन्द्रीय सहअध्यक्ष गंगा थापा मगरले गरेका थिए ।
दाङसहित सल्यान, रोल्पाका गरी जम्मा १८ टीमको सहभागीता रहेको प्रतियोगितामा जम्म १५ वटा खेल हुने प्रतियोगिता संयोजक घर्तीले बताए । फागुन १० गते फाईनल खेल हुने गरी खेल तालिका सार्वजनिक गरिएको प्रतियोगिता सहसंयोजक अशोक घर्तीले बताए ।
सहिद थापा मगरको स्मृति दिवसको अवसरमा हरेक वर्ष फुटबल प्रतियोगिताको आयोजना गर्दै आइरहेको भन्दै आयोजक नेपाल मगर संघले खेलकुदको विकाससँगै सहिदको सम्मानका लागि कार्यक्रम आयोजना गरिएको जनाएको छ ।
प्रतियोगितामा प्रथम हुने टीमले नगद १ लाखसहित शिल्ड, मेडल र प्रमाण पत्र पाउने छ भने द्वितीय हुने टिमलाई पचास हजार नगदसहित शिल्ड, मेडल र प्रमाण पत्र पुरस्कार दिइने छ । यसैगरी विधागत उत्कृष्ट खेलाडीलाई पनि पुरस्कृत गरिने आयोजकले जनाएको छ ।
नेपालका प्रथम सहिद लखन थापा मगरलाई सम्मान गर्न राज्यले ध्यान नदिएको मगर समुदायका अगुवाहरुले गुनासो गरेका छन् । प्रथम सहिद लखन थापा मगरको १४८ औं स्मृति दिवसको अवसर पारेर नेपाल मगर संघ घोराही नगर समितिले शुक्रबार घोराहीमा आयोजना गरेको कार्यक्रममा सहभागी मगर अगुवाहरुले देशका लागि बलिदानी दिएर शाहदात प्राप्त गरेका प्रथम शहीदलाई राष्ट्रिय विभूति घोषणा गर्न सरकारले ध्यान दिनुपर्ने माग गरेका हुन् ।
मगर संघ घोराहीका अध्यक्ष बेदबहादुर बुढाको अध्यक्षता तथा नेपाल मगर संघको केन्द्रीय सह–अध्यक्ष गंगा थापा मगरले राज्यले सच्चा सहिदको सम्मानमा कन्जुस्याईँ गर्न नहुनेमा जोडसमेत दिएका छन् । केन्द्रीय सह–अध्यक्ष थापा मगरले राज्यले लखन थापा मगरलाई प्रथम सहिद मात्रै घोषणा गरेपनि स्मृतिमा सम्मानका कार्यक्रम नगर्दा प्रथम सहिदको अपमान हुने अवस्था सिर्जना भएको तर्क गरे ।
उनले मगर भाषा, कला, संस्कृति संरक्षणमा समुदाय नै जाग्नुपर्ने बेला आएको बताए । भाषा, कला, संस्कृति संरक्षणमा राज्यले विभेद गर्दा जोखिममा परेको भन्दै यसमा सबै गम्भीर हुन आवश्यक रहेको बताए ।
यसैगरी, नेपाल मगर संघका केन्द्रीय उपाध्यक्ष दरजीत रोकाले शहीद सबैको साझा सम्पत्ति भएकाले लखन थापालाई सबैले सम्मान गर्न आवश्यक रहेको बताए । सो अबसरमा नेपाल मगर संघका केन्द्रीय उपमहासचिव सावित्रा राना मगर, घोराही १४ का वडा अध्यक्ष भानसिंह बुढा, नेपाल मगर संघ केन्द्रीय अनुसन्धान विभाग सदस्य कर्णबहादुर बुढा मगर, नेपाल मगर संघ केन्द्रीय सदस्य शारदा पुन मगर, नेपाल मगर संघ घोराही नगर शिक्षा सदस्य कमला देउजा पुन, नेपाल मगर संघ लुम्बिनी प्रदेश अनुशासन विभाग आयोग सदस्य खलुप्रसाद पुन, नेपाल मगर संघ लुम्बिनी प्रदेश सदस्य कैलाश रोका मगर, नेपाल मगर संघ दाङ जिल्ला समन्वय समिति अध्यक्ष मुक्त बुढा मगर, उपाध्यक्ष प्रेम बुढा मगरलगायत बोलेका थिए ।
सो अवसरमा लखन पार्कमा रहेको लखन थापा मगरको शालिकमा उपस्थित व्यक्तिहरुले माल्यार्पण गर्दै सम्मान प्रकट गरेका थिए । कार्यक्रममा मगर समुदायको विभिन्न कला, संस्कृति प्रस्तुत गरिएको थियो ।
२७ मंसिर २०८२, शनिबार
