खोज

बुटवल, २ फागुन ।

दश वर्षे “जनयुद्ध” नै नेपालमा परिवर्तनको आधार भएको कम्युनिष्ट नेताहरूले बताएका छन्। नेपाल कम्युनिस्ट पार्टी (माओवादी केन्द्र) र नेपाल कम्युनिस्ट पार्टी रुपन्देहीले बिहीबार बुटवलमा आयोजना गरेको “जनयुद्धको उपलब्धि र सीमा” विषयक अन्तत्र्रिmयामा वक्ताहरूले गणतन्त्र, संघीयता र धर्मनिरपेक्षता जस्ता ऐतिहासिक उपलब्धिहरू माओवादी युद्धकै उपज भएको बताएका हुन्।

कार्यक्रममा बोल्दै नेपाल कम्युनिस्ट पार्टीका पोलिटब्युरो सदस्य वसन्त सीले दश वर्षे युद्ध नेपाली इतिहासको महत्त्वपूर्ण अभियान भएको बताउँदै भने, “जनयुद्धको गौरवपूर्ण इतिहासलाई तोडमोड गर्ने केही प्रतिगामी तत्व सक्रिय छन्, तर जनताले लडेर ल्याएको व्यवस्थाको अवमूल्यन गर्ने अधिकार कसैलाई छैन।”

नेकपा (माओवादी केन्द्र) का केन्द्रीय सदस्य वामदेव क्षेत्रीले माओवादी आन्दोलनले राजतन्त्र र सामन्तवादको अन्त्य गर्दै शान्ति र समृद्धिको नेतृत्व गरिरहेको बताए। उनले भने, “राज्य वर्गीय हुन्छ, हिजो निरंकुश सत्ताले दमन गरेकाले हामी युद्धमा गयौं। आजको राजनीति र सामाजिक परिवर्तनको आधार नै जनयुद्ध हो।”

कार्यक्रममा वामपन्थी बुद्धिजीवी दिल साहनी, घनश्याम पाठक, वरिष्ठ पत्रकार डा. बालकृष्ण चापागाईं, नेपाली कांग्रेसका जिल्ला कोषाध्यक्ष हरि अर्याल, नेकपा एमालेका जिल्ला सहसचिव बाबुराम पन्थी, एकीकृत समाजवादीका जिल्ला इन्चार्ज नन्दराम बन्जाडे लगायतका वक्ताहरूले “जनयुद्ध” नेपाली इतिहासको महत्त्वपूर्ण अध्याय भएकाले यसको रक्षा र विकास गर्नु सबैको दायित्व भएको बताएका थिए।

वक्ताहरूले टुक्रिएको माओवादी आन्दोलनलाई एकीकृत गर्दै समग्र वाम शक्तिहरूबीच ध्रुवीकरण आवश्यक रहेको उल्लेख गरे। संविधानले परिकल्पना गरेको समाजवादी प्रणालीतर्फ अगाडि बढ्नु अहिलेको प्रमुख दायित्व भएको उनीहरूको भनाइ थियो।

नेकपा (माओवादी केन्द्र) रुपन्देही जिल्ला संयोजक नारायण जिसी ‘निर्मल’ को अध्यक्षतामा सम्पन्न कार्यक्रममा जनवादी कलाकारहरूले सांस्कृतिक प्रस्तुति दिएका थिए।