खोज

जितपुर, ३० माघ।
कपिलबस्तुमा हुने दोस्रो मुख्यमन्त्री कपिलवस्तु तिलौराकोट गोल्डकप नकआउट फुटबल प्रतियोगिताको तयारी तिब्र गरिएको छ । अखिल नेपाल फुटबल संघ (एन्फा), प्रदेश खेलकुद परिषद् लुम्बिनी, राष्ट्रिय खेलकुद परिषद् प्रवद्र्धक बाणगंगा, शिवराज, कपिलवस्तु, कृष्णनगर, बुद्धभूमि नगरपालिका र विजयनगर गाउँपालिका संरक्षक तथा कपिलवस्तु जिल्ला फुटबल संघको आयोजनामा फागुन १४ गतेदेखि सुरु हुने प्रतियोगिताको मैदान मर्मत, टिम दर्ता लगायतका धेरै कामहरु अन्तिम चरणमा पुगेको हो ।

संघका अध्यक्ष तिलक थापाले प्रतियोगिताको तयारीलाई अन्तिम चरणमा पुगेको बताए । प्रतियोगिता आयोजना हुने बाणगंगा नगरपालिका–४ स्थित बुद्ध रंगशालालाई सजाउने काम भैरहेको छ । प्रतियोगिताको विजेता टिमले नगद ११ लाख ११ हजार १११ रूपैयाँ, ट्रफी, मेडल र प्रमाणपत्र तथा उपविजेता टिमले नगद ५ लाख ५५ हजार ५५५ रूपैयाँसहित ट्रफी, मेडल र प्रमाणपत्र पाउनेछ । विधागत उत्कृष्ट खेलाडीहरूका लागि पनि आकर्षक पुरस्कारको व्यवस्था गरिएको छ ।

यो संस्करणमा ६ वटा ए डिभिजन क्लब, एउटा मोफसल टिम र एक विदेशी टिम गरी कुल ८ टिम सहभागी हुनेछन् । सहभागी टिमहरूमा कपिलवस्तु ११ (कपिलवस्तु), मछिन्द्र फुटबल क्लब (काठमाडौं), हिमालय शेर्पा क्लब (काठमाडौं), संकटा क्लब (एस.बी.एस.सी काठमाडौं), थ्री स्टार क्लब (ललितपुर), हनामी बीएफसी (भरतपुर), झापा ११ फुटबल क्लब (बिर्तामोड, झापा) र डोजेन्ग्री फुटबल क्लब (सिक्किम, भारत) रहेका छन् ।