खोज

भैरहवा, १ फागुन ।

प्रहरीहरूको स्वास्थ्यलाई मध्यनजर गर्दै जिल्ला प्रहरी कार्यलय रुपन्देहीमा बुधबार निशुल्क स्वास्थ्य परीक्षण गरिएको छ। नेपाल प्रहरी श्रीमती संघ लुम्बिनी प्रदेशको आयोजना तथा युनिभर्सल कलेज अफ मेडिकल साइन्सेस शिक्षण अस्पताल भैरहवाको प्राविधिक सहयोगमा जिल्ला प्रहरी कार्यलय रुपन्देहीका प्रहरी कर्मचारीहरूको निशुल्क स्वास्थ्य परीक्षण गरिएको हो। शिविर कार्यक्रममा बोल्दै प्रमुख अतिथि तथा नेपाल प्रहरी श्रीमती संघ लुम्बिनी प्रदेशका अध्यक्ष नविना खत्रीले प्रहरीको पेशा सेवा मात्र नभई समाजमा न्याय कायम राख्ने, समुदायको सुरक्षा सुनिश्चित गर्ने, प्रहरीहरू नगरीको विश्वासको धरोहर रहेको बताइन्।
“समाज र चुनौतिहरूको सामना गर्दागर्दै प्रहरी कर्मचारीहरूले आफ्नो स्वास्थ्य प्रति ध्यान पुर्याउन नसक्दा यस्ता शिविर कार्यक्रमहरूले प्रहरी कर्मचारीहरूलाई स्वास्थ्य प्रति सचेत गराउने माध्यम बनेको छ।” अध्यक्ष खत्रीको भनाइ छ।

उक्त शिविरमा जिल्ला प्रहरी कार्यलय रुपन्देहीका प्रमुख रञ्जित सिंह राठोरले भने, “हामी प्रहरी अरूका लागि खटिरहेका हुन्छौं र अरूका लागि खटिरहँदा हामीले स्वास्थ्यको ख्याल गर्न पाउँदैनौं, अलि अफ्ट्यारो भयो भने मात्र चेकजाच गराउने र अस्पताल जाने गर्छौं जसले गर्दा स्वास्थ्यमा धेरै समस्या र रोगहरू निम्त्याउने गर्दछ।” सोही कारणलाई मध्यनजर गर्दै यस किसिमका शिविरहरू गर्दै आएको उनले बताए।

युसिएमएस भैरहवाका प्रशासन प्रमुख तेज कुमार केसीले शिविरमा मुटुको ईसीजी, महिला तथा प्रसुति जाँच, छाला, नाक कान घाटी, मस्तिष्क तथा नसा रोग, फिजिसियन लगायत विभिन्न चेकजाँचका लागि करिब १५ जना डाक्टरद्वारा प्रहरीहरूको उपचार गरिएको बताए।

साथै उनले उपचार गराउन नसकेको अथवा उपचार गर्न नभ्याएका प्रहरीहरूको अस्पतालमा उपचार गर्ने बताउनु भएको छ।
निशुल्क स्वास्थ्य परीक्षणमा २०० जना प्रहरी लाभान्वित भएका छन्। युसिएमएसका डाक्टर तथा सहायक प्राध्यापक राहुल यादवले २०० जना प्रहरीमा रोगहरू देखिएको बताएका छन्। नियमित हुने हाइपोटेन्सन, डायबिटीज, थाइराइड लगायत धेरै समस्याहरू देखिएका छन् र अस्पताल फलोअप नगरेका कारण विभिन्न समस्याहरू बढेको पनि उनले बताए। साथै महिलाहरूमा सेतो पानी बग्ने समस्या बढी देखिएको उनले बताए।

उपचार गराएका बिरामीहरूलाई अस्पतालले निशुल्क औषधि पनि वितरण गरेको छ। शिविरमा सहभागीहरूले सामान्य स्वास्थ्य परीक्षण, औषधि वितरण र स्वास्थ्य सम्बन्धी परामर्श सेवा प्राप्त गरेका छन्। यस पहलले प्रहरीहरूको स्वास्थ्यमा सुधार ल्याउन र स्वास्थ्य सेवाको पहुँचलाई बढावा दिन महत्त्वपूर्ण भूमिका खेलेको छ।