खोज

दाङ, १ फागुन ।

दाङ जिल्ला उद्योग वाणिज्य संघको आयोजनामा यही फागुन २ गतेदेखि घोराहीमा सुरु हुने ‘छैठौँ कृषि, पर्यटन तथा व्यापार महोत्सव–२०८१’ को तयारी पूरा भएको छ । महोत्सवका लागि आवश्यक भौतिक पूर्वाधार निर्माणको तयारी सम्पूर्ण पूरा भएको संघले पत्रकार सम्मेलन गरेर जानकारी दिएको छ ।

दाङ जिल्ला उद्योग वाणिज्य संघले महोत्सव स्थलमा पत्रकार सम्मेलन गरेर सम्पूर्ण तयारी पूरा भएको जानकारी दिएको हो । पत्रकार सम्मेलनमा बोल्दै संघका अध्यक्ष एवं आयोजक मूल समितिका संयोजक वसन्त जोशीले महोत्सवका लागि सम्पूर्ण तयारी पुरा भएको बताए । महोत्सवका लागि आवश्यक भौतिक पूर्वाधार, मञ्च, बाल उद्यान, स्टलहरु लगायत सम्पूर्ण भौतिक संरचना तयार भएको उनले जानकारी दिए ।

महोत्सवको लुम्बिनी प्रदेशका उद्योग पर्यटन तथा यातायात मन्त्री प्रचण्डविक्रम न्यौपाने (गुन्टु)ले गर्ने उनले जानकारी दिए ।

महोत्सवको उद्घाटन पूर्व घोराहीमा झाँकी सहित शोभायात्रा हुने छ । दाङ जिल्ला उद्योग वाणिज्य संघको कार्यालयबाट सुरु हुने शोभायात्रा लखन पार्क, दामोदर चोक, भानुचोक हुँदै महोत्सवस्थल घोराही उपमहानरपालिका–१४ झिँगौरामा पुग्ने दाङ जिल्ला उद्योग वाणिज्य संघका वरिष्ठ उपाध्यक्ष नरेशकुमार श्रेष्ठले जानकारी दिए ।

महोत्सवमा हरेक दिन राष्ट्रिय चर्चित कलाकारहरुको प्रस्तुति रहने छ । दैनिक सांस्कृतिक कार्यक्रम अन्तर्गत ख्यातीप्राप्त कलाकारहरुका साथै दंगाली कलाकारहरु एवं लोक संस्कृति झल्कने कलाहरु प्रस्तुति रहने आयोजकले जानकारी दिए ।

महोत्सवमा प्रवेशका लागि प्रतिव्यक्ति १ सय, विद्यार्थीहरुलाई परिचयपत्रको आधारमा ८०, अशक्त, अपाङ्ग, ज्येष्ठ नागरिकहरुलाई निःशुल्क प्रवेशको व्यवस्था मिलाइएको टिकट व्यवस्थापन उपसमितिका संयोजक माधव खनालले जानकारी दिए । महोत्सवमा २ लाख दर्शकहरुले अवलोकन गर्ने र २० करोडको कारोबार गर्ने लक्ष्य रहेको आयोजकले जनाएको छ ।