खोज

 काठमाडौं ।

अमेरिकामा एकपछि अर्को विमान दुर्घटना भइरहेका छन्। सोमबार एरिजोनास्थित स्कट्सडेल विमानस्थलमा दुई निजी विमान एकापसमा ठोकिएका छन्। दुर्घटनामा कम्तीमा एक जनाको मृत्यु भएको र चार जना घाइते भएको अन्तर्राष्ट्रिय सञ्चारमाध्यमले जनाएको छ।

उड्डयन योजना र आउटरिच संयोजक केली कुएस्टरका अनुसार, स्कट्सडेल विमानस्थलमा एउटा मध्यम आकारको व्यावसायिक जेट धावनमार्गबाट बाहिर निस्केर पार्किङमा रहेका एउटा निजी जेटसँग ठोकिएको हो। स्कट्सडेल अग्नि नियन्त्रण विभागका क्याप्टेन डेभ फोलियोले घटनामा एक जनाको घटनास्थलमै मृत्यु भएको र चार घाइतेमध्ये एक जनाको अवस्था गम्भीर रहेको बताए।

यो घटनाले अमेरिकामा विमान दुर्घटनाको बढ्दो संख्या पनि प्रकट गरेको छ। दुई हप्ताभित्र अमेरिकामा यो चौथो विमान दुर्घटना हो। गत जनवरी २९ मा वासिङ्टन डिसीमा अमेरिकी सेनाको ब्ल्याक हक हेलिकप्टर र यात्रुवाहक विमानको आकासमा ठोक्किँदा ६७ जनाको मृत्यु भएको थियो। यस घटनाको दुई दिनपछि फिलाडेल्फियामा मेडिकल विमान दुर्घटनामा परेर ७ जनाको मृत्यु भयो र २४ जना घाइते भए।

त्यसैगरी, गत हप्ता अलास्कामा सानो यात्रुवाहक विमान दुर्घटनामा परेर १० जनाको मृत्यु भएको थियो।

अमेरिकामा विमान दुर्घटनाका घटनाहरू लगातार बढ्दै गएपछि सुरक्षा उपायहरूको पुनरावलोकन र सुधारको माग गहिरो भइरहेको छ।