खोज

दाङ, २९ माघ ।

अवरुद्ध घोराही तुलसीपुर सडक खुलेको छ । सोमबार बिहानदेखि अवरुद्ध तुलसीपुर–घोराही सडक अपराह्न ४ बजेपछि पुनः सञ्चालनमा आएको छ ।

पीडितलाई ५ लाख रुपैयाँ दिने र तत्काल ५० हजार रुपैयाँ पाउने सहमति भएपछि ८ घण्टापछि अवरुद्ध सडक पुनः खोलिएको प्रहरीले जनाएको छ । इलाका प्रहरी कार्यालय तुलसीपुरमा भएको छलफलमा एक हप्ता भित्र पीडितसँग दोस्रो चरणको छलफल गर्ने र नियमानुसार रु ५ लाख उपलब्ध गराउने सहमति भएको इलाका प्रहरी कार्यालय तुलसीपुरले जनाएको छ। आइतबार तुलसीपुरको हात्तीखौवा चोक नजिकै ट्रकको ठक्करबाट तुलसीपुर–७ घुसेरीका ५६ वर्षीय जंगबहादुर चौधरीको मृत्यु भएको थियो।

ट्रक दुर्घटनामा चौधरीको मृत्यु भएपछि मृतकका आफन्तले दोषीलाई कारबाही र उचित क्षतिपूर्तिको माग गर्दै सोमबार बिहानदेखि घोराही–तुलसीपुर सडक अवरुद्ध गरेका थिए । बिहानदेखि अवरुद्ध भएको सडक अहिले सञ्चालनमा आएको छ र यात्रुहरू आ–आफ्नो गन्तव्यतर्फ लागेका छन् ।

आइतबार दिउँसो ३ बजेतिर घोराहीतर्फ जाँदै गरेको ना ६ ख ५९२२ नम्बरको ट्रकले लु.प्र.०२–००१ प २८३८ नम्बरको मोटरसाइकललाई ठक्कर दिँदा चौधरीको घटनास्थलमै मृत्यु भएको थियो। तुलसीपुर–७ का ४७ वर्षीय मोटरसाइकल चालक तीर्थबहादुर खत्री ट्रकको ठक्करबाट गम्भीर घाइते भएका छन्।

ट्रक चालक बाराको जितपुर सिमरा उपमहानगरपालिका–१६ का ४५ वर्षीय जयराम अधिकारीलाई नियन्त्रणमा लिइएको प्रहरीले जनाएको छ।