© २०२३
२९ मंसिर २०८२, सोमबार
२९ मंसिर २०८२, सोमबार
मकवानपुर।
मकवानपुरको भीमफेदी गाउँपालिका वडा नम्बर १ स्थित रातोमाटेमा त्रिभुवन राजपथ सडक खण्डमा ग्यास बुलेट दुर्घटना भएको छ। दुर्घटनापछि उक्त सडक खण्ड एकतर्फी सञ्चालनमा आएको छ, जसका कारण यातायातमा असहजता भएको छ।
आइतबार राति करीब ९ बजेको समयमा हेटौँडा बजारबाट भैँसेतर्फ जाँदै गरेको एनएल ०१ के ११९७ नम्बरको १२ चक्के इन्डियन ग्यास लोड बुलेट गाडी दुर्घटना भएको हो।
प्रहरीका अनुसार, ग्यास बुलेट सडकको भित्तामा पल्टिएको र त्यसको परिणामस्वरूप अस्थायी रूपमा साना सवारी साधनका लागि एकतर्फी ट्रयाक खोलिएको छ। प्रहरी प्रवक्ता डिएसपी श्यामु अर्यालका अनुसार, ग्यास बुलेट दुर्घटनामा मानवीय क्षति नभएको जानकारी प्राप्त भएको छ।
प्रवक्ता अर्यालले गाडी चालकले साँचो बाटो बिराएर साँघुरो र अप्ठ्यारो भूगोलका कारण दुर्घटना भएको बताउनुभयो। उनले भने, “पल्टिएको ग्यास बुलेट उठाउन केही समय लाग्नेछ र त्यस अवधिमा काठमाडौँ जाने यात्रीहरूले कान्तिलोक पथ वा चितवनतर्फको बाटो प्रयोग गर्न आग्रह गर्दछौं।”
त्यसै गरी, प्रहरीले ग्यास बुलेटबाट ग्यास लिक नभएको र लिक हुने सम्भावना पनि नरहेको जानकारी दिएको छ।
© २०२३
सर्वाधिकार सुरक्षित
Design & Developed By:
