खोज

मनाङको चामे गाउँपालिका–१ तिमाङ जङ्गलमा लागेको डढेलो १० दिनसम्म पनि नियन्त्रणमा आउन सकेको छैन। यही माघ १८ गते बेलुकीदेखि सुरु भएको डढेलो जटिल भूगोलका कारण नियन्त्रण गर्न समस्या भएको जिल्ला प्रशासन कार्यालयले जनाएको छ।

प्रमुख जिल्ला अधिकारी मातृका आचार्यका अनुसार डढेलोको नियन्त्रणका लागि जिल्लाका सबै सुरक्षा संयन्त्र परिचालन गरिएको छ। उनले भने, “स्थानीय पनि सक्रिय भएर जङ्गलमा खटिनुभएको छ, तर हालसम्म डढेलो नियन्त्रणमा लिन सकिएको छैन।”

आगलागीको कारण जङ्गलमा रहेका भेडा, च्याङ्ग्रा, याक, चौँरीका चरन क्षेत्र नष्ट भएका छन्। प्रमुख जिल्ला अधिकारी आचार्यका अनुसार आगो बस्तीभन्दा टाढाको जटिल भूगोलमा लागेको र यहाँ हावा चल्ने भएकाले डढेलोको जोखिम अझै बढ्न सक्ने अवस्था छ। साथै, राष्ट्रिय पन्छी डाँफेको बासस्थान र लालीगुँरासको बोट पनि नष्ट भएको जानकारी दिएका छन्।

सुरक्षाकर्मी र स्थानीयले जानसक्ने स्थानमा पुगेर डढेलो निभाउने प्रयास गरिरहेका छन्, तर कठिन र जोखिमपूर्ण भिरमा आगलागी भएको कारण डढेलो नियन्त्रणमा समस्या भइरहेको छ। भुजेलका अनुसार अन्नपूर्ण संरक्षण क्षेत्र अन्तर्गत हिउँ नपर्नु र सुक्खा मौसमका कारण आगलागी भएको हो।

यस वर्ष पनि संरक्षण क्षेत्रको वनजङ्गलमा आगलागीको घटनाहरू भइरहेका छन्। आगलागीका कारण वन्यजन्तु र पशुपन्छीको बासस्थानमा प्रभाव परेको छ र जडीबुटी नष्ट हुने खतरा बढेको छ।मनाङको तिमाङ जङ्गलमा लागेको डढेलो नियन्त्रण गर्न अबको केही दिनभित्र सरकारको तत्कालीन पहल आवश्यक रहेको स्थानीयको जोड छ।