खोज

बुटवल, २७ माघ ।

नेकपा माओवादी केन्द्रका उपाध्यक्ष तथा पूर्वसभामुख कृष्णबहादुर महराले २०८४ सालको संघीय चुनावमा माओवादी केन्द्रले एकल बहुमत ल्याउने दाबी गरेका छन् ।

रुपन्देहीस्थित लुम्बिनी साँस्कृतिक नगर समितिको तेस्रो अधिवेशनलाई सम्बोधन गर्दै उनले माओवादीको पक्षमा जनलहर बढ्दै गएको बताए । उनका अनुसार वर्तमान सरकारको कार्यशैलीप्रति असन्तुष्ट सचेत नागरिकहरू देशभर माओवादी केन्द्रमा प्रवेश गरिरहेका छन् ।

उनले जनताको विश्वास जित्न नेता तथा कार्यकर्ताहरूलाई घरदैलो अभियानमा सक्रिय हुन निर्देशन दिए। नेता महराले माओवादी केन्द्रले मुलुकलाई आर्थिक, सामाजिक, तथा राजनीतिक रूपमा रूपान्तरण गर्ने स्पष्ट एजेन्डा अघि सारेको हुँदा जनताको आकर्षण बढ्दै गएको बताए। “आज मुलुकमा अन्योल र निराशा छ। सरकारको रवैया जनतामैत्री छैन। तर, माओवादी केन्द्रले स्थिर राजनीति, समृद्ध अर्थतन्त्र र समानताको पक्षमा उभिएको छ। यही कारण जनता हाम्रो पक्षमा एकजुट भइरहेका छन्,” उनले भने।

महराका अनुसार पूर्वदेखि पश्चिमसम्म सचेत नागरिकहरू माओवादी केन्द्रमा प्रवेश गरिरहेका छन्। माओवादिले सरकारमा जानुभन्दा जनतामाझ जाने नीति बनाएको बताए । महराले माओवादी केन्द्र आगामी तीन वर्षसम्म सरकारमा सहभागी नहुने स्पष्ट पारे। बरु, पार्टीका नेता–कार्यकर्ताहरू जनताको घरदैलोमा पुगेर संवाद गर्ने नीति लिएको बताए।

“माओवादी केन्द्र २०८४ सम्म सरकारमा जाँदैन। बरु, हरेक नेता–कार्यकर्ता गाउँ, बस्ती, टोल र नागरिकका घरदैलोमा पुग्छन्। सत्ताभन्दा पनि जनताको विश्वास जित्नु महत्वपूर्ण छ,” महराले भने।उनका अनुसार माओवादी केन्द्रले संगठन सुदृढीकरण, युवापुस्ताको परिचालन, र विकासका ठोस योजनाहरू लिएर जनता समक्ष जानेछ। उनले माओवादि केन्द्रले सिमान्तकृत समुदायका अधिकारका लागि प्रतिबद्धता रहेको बताए नेता महराले माओवादी केन्द्रले मधेसी, मुस्लिम, थारू, दलित, जनजाति तथा अन्य सिमान्तकृत समुदायहरूको हकहितका लागि संघर्ष जारी राख्ने बताए।

“दसवर्षे जनयुद्ध केवल सत्ता प्राप्तिका लागि थिएन, यो जनताको मुक्तिका लागि थियो। हामीले गरेका बाचा पूरा गर्ने समय आएको छ,” उनले भने। उनले जनयुद्धकै कारण मुलुकमा संघीयता, धर्मनिरपेक्षता, समावेशीता र समानुपातिक प्रणालीको स्थापना सम्भव भएको बताए।महराले २०८४ को चुनावलाई लक्षित गर्दै माओवादी केन्द्रले व्यापक जनमत निर्माण अभियान सञ्चालन गर्ने जानकारी दिए।

पार्टीले संगठन पुनर्गठन, जनपरिचालन, तथा स्थानीय स्तरमा माओवादीको पहुँच विस्तार गर्ने लक्ष्य राखेको छ।“अब हामी फेरि जनताको घरदैलोमा पुग्नेछौँ, उनीहरूको गुनासा सुन्नेछौँ र माओवादी आन्दोलनलाई नयाँ उचाइमा पु¥याउनेछौँ,” महराले भने। उनले पार्टीका कार्यकर्तालाई अनुशासित, सक्रिय र संगठित भएर जनताको सेवामा समर्पित हुन निर्देशन दिँदै माओवादी केन्द्रलाई २०८४ मा पहिलो पार्टी बनाउने लक्ष्य पूरा गर्न जुट्न आग्रह समेत गरे।