खोज

सप्तरी ।

सप्तरी जिल्लाको राजविराज नगर क्षेत्रभित्र अवैध मदिरा उत्पादन तथा अव्यवस्थित खुल्लमखुल्ला बिक्री वितरणको कारण महिला तथा बालबालिका असुरक्षित भएको भन्दै एक सामाजिक संस्थाले त्यसविरुद्ध आवाज उठाएको छ।

नगरक्षेत्रमा जताततै अनियन्त्रित रूपमा सञ्चालनमा रहेका अवैध मदिरा पसल तथा उत्पादन गर्ने भट्टीहरूलाई नियन्त्रण गर्न तराई-मधेश महिला फाउण्डेशनले नगरपालिकाको ध्यानाकर्षण गराएको हो।

फाउण्डेशनकी अध्यक्ष सुनिता साह क्रान्तिको नेतृत्वमा गएको महिला टोलीले बुधबार राजविराजकी कार्यवाहक मेयर इसरत परविनलाई ध्यानाकर्षण पत्र बुझाएको थियो।

नगर क्षेत्रभित्र अव्यवस्थित रूपमा मदिरा पसलहरू सञ्चालन गर्न इजाजत दिइएको अवस्था विद्यमान रहेको छ। मदिरा पसल सञ्चालन तथा समय सिमा निर्धारण नगरी मदिरा सेवन गर्ने केही व्यक्तिहरूले बाटो हिँड्ने महिला दुर्व्यवहार गर्ने गरेको गुनासो बढ्दै गएको छ।

उक्त अवस्थाप्रति हाम्रो गम्भीर ध्यानाकर्षण भएको ध्यानाकर्षण पत्रमा उल्लेख छ। यसप्रकार खुलेआम जथाभावी मदिरा पसल सञ्चालनको इजाजत, मदिरा सेवन गर्ने समय, बाटोघाटोमा मदिरा सेवन गरी गरिरहेको अभद्र व्यवहार र तनाव व्यवस्थापन गर्न गराउन नगरपालिकालाई ध्यानाकर्षण गराएको फाउण्डेशनकी अध्यक्ष क्रान्तिले बताएकी छन्।

यस्ता कियाकलापलाई समयमा नियन्त्रण गर्न गराउन अपिल गर्दै समस्या समाधानका लागि आवश्यक पहल नगरिए बाध्य भएर विरोधका कार्यकम अघि सार्ने अध्यक्ष क्रान्तिले चेतावनी दिइन्।

लामो समयदेखि फाउण्डेशन महिलाहरुको हकहितको लागि विभिन्न किसिमका कार्यक्रम गर्दै आएको छ।