खोज

हैदाराबाद, २२ माघ ।

दक्षिण भारतीय फिल्म उद्योगका चर्चित निर्माता केपी चौधरीले गोवामा आत्महत्या गरेका छन्। उनी लामो समयदेखि आर्थिक संकटसँग जुधिरहेका थिए र व्यक्तिगत जीवनमा डिप्रेसनको सामना गर्दै थिए। प्रहरीका अनुसार, केपी चौधरी पहिले नै आर्थिक कठिनाइमा थिए, र लागुऔषध मुद्दामा जेल गएपछि उनका मानसिक अवस्था थप बिग्रिएको थियो।

गोवा प्रहरीले जनाएका अनुसार, उनी ४४ वर्षका थिए र उनकाे शव गोवाका सियोलेमस्थित भाडाको घरमा झुण्डिएको अवस्थामा फेला परेको थियो।

केपी चौधरीलाई सन् २०२३ मा हैदराबाद प्रहरीले लागुऔषध मुद्दामा पक्राउ गरेको थियो। उनी दक्षिण भारतीय फिल्म उद्योगका प्रसिद्ध निर्माता थिए र रजनीकान्तको फिल्म ‘काबली’का निर्माता थिए। सोही वर्ष, हैदराबादको स्पेशल अपरेशन टोलीले उनलाई लागूऔषध कारोबारको आरोपमा पक्राउ गरेको थियो।

रिपोर्ट अनुसार, चौधरी गहिरो ऋणमा थिए र तीव्र दबाबमा रहेका थिए। कोरोनाको समयमा फिल्म उद्योग ठप्प भएपछि उनले लागुऔषध कारोबारको क्षेत्रमा हात राखेका थिए र यसबाट पैसा कमाउन थालेका थिए। उनले गोवामा ओएचएम नामक पब खोलेका थिए, जहाँ उनी ग्राहकहरूसँग लागुऔषधको आपूर्ति गर्ने गर्दथे।

‘काबली’ फिल्मको कुरा गर्दा, यो फिल्मलाई दर्शकहरूले निकै रुचाएका थिए। फिल्मको बजेट करिब १०० करोड थियो र यसले ३०० करोडभन्दा बढीको कलेक्शन गरेको थियो। सन् २०१६ मा रिलिज भएको यो फिल्ममा रजनीकान्त र राधिका आप्टे मुख्य भूमिकामा थिए।