खोज

पाल्पा, २२ माघ ।

पाल्पामा यस वर्ष नौ हजार ९८ मेट्रिक टन सुन्तला उत्पादन भएको छ। गत वर्ष आठ हजार आठ सय ६१ मेट्रिक टन उत्पादन भएको कृषि ज्ञान केन्द्रले जानकारी दिएको छ। यस वर्ष अघिल्लो वर्षको तुलनामा तीन सय ३७ मेट्रिक टन उत्पादनमा वृद्धि भएको छ।

कृषि ज्ञान केन्द्रका प्रमुख सन्तोषकुमार चौधरीका अनुसार, यस वर्ष सुन्तलाबाट रु ५२ करोड ७६ लाख ८४ हजारको बिक्री भएको छ, जबकि गत वर्ष रु ४६ करोड सात लाख ७२ हजारको बिक्री भएको थियो। यस वर्ष सुन्तला बिक्रीबाट रु ६ करोड ६९ लाख १२ हजार बढी आम्दानी भएको छ।

चौधरीले भने, “सुन्तलाबाट राम्रो आम्दानी हुने भएपछि पछिल्लो समय यहाँका किसान व्यावसायिक उत्पादनमा लाग्नुभएको छ। अघिल्लो वर्षको तुलनामा यस वर्ष उत्पादन क्षेत्र बढेको छ र बजारीकरण पनि सहज भएको छ।”

पाल्पाका विभिन्न स्थानहरूमा सुन्तला उत्पादन भइरहेको छ। रैनादेवीछहरा गाउँपालिकामा चार सय ५२ हेक्टर क्षेत्रफलमा तीन हजार छ सय ३९ मेट्रिक टन, रिब्दिकोट गाउँपालिकामा तीन सय ९६ हेक्टरमा तीन हजार एक सय ८४ मेट्रिक टन, बगनासकाली गाउँपालिकामा एक सय १३ हेक्टरमा नौ सय १० मेट्रिक टन, पूर्वखोला गाउँपालिकामा ९० हेक्टरमा सात सय २८ मेट्रिक टन, तानसेन नगरपालिकामा ६८ हेक्टरमा पाँच सय ४६ मेट्रिक टन र माथागढी गाउँपालिकामा ११ हेक्टरमा ९१ मेट्रिक टन सुन्तला उत्पादन भएको छ।

जिल्लामा सुन्तला उत्पादनका लागि एक हजार एक सय ९६ हेक्टर क्षेत्रफल रहेको छ, जसमा एक हजार एक सय ३० हेक्टर क्षेत्रफल व्यावसायिक उत्पादनका लागि प्रयोग गरिएको छ। पाल्पाका दश पालिकामध्ये छवटा पालिकामा व्यावसायिक हिसाबले सुन्तला उत्पादन भइरहेको छ। अन्नबालीको तुलनामा सुन्तलाबाट राम्रो आम्दानी हुने देखिएको छ, जसले गर्दा यहाँका किसान व्यावसायिक उत्पादनमा जोड दिइरहेका छन्।