खोज

बुटवल, २२ माघ ।
नारायणगढ–बुटवल सडकखण्ड बिस्तारको कामले पछिल्लो पटक गति लिएको छ । सडक योजना पूर्वीखण्डका सूचना अधिकारी इन्जिनियर शिव खनालले उक्त खण्डका विभिन्न १८ स्थानमा कालोपत्र गर्नेगरी काम भइरहेको बताए । राष्ट्रिय गौरवको आयोजनाअन्तर्गतको यो सडक धेरैजसो सडक एकतर्फी रूपमा कालोपत्रे भएको छ ।
इन्जिनियर खनालका अनुसार फेब्रुअरीमा गैँडाकोटबाट दुम्कीबासम्म एकतर्फी पुल र कल्भर्ट रहेका ठाउँबाहेकका सडकमा कालोपत्र गर्नेगरी काम भइरहेको छ । अहिले गैँडाकोटबाट दाउन्नेसम्म ४० किलोमिटर एकतर्फी कालोपत्र भएको छ । अब करिब २२ किलोमिटर सडक कालोपत्र सकिएपछि नारायणगढबाट दाउन्नेसम्म एक लेन सडकमा कालोपत्रको काम सकिनेछ । चालु महिनामा दाउन्नेसम्म नै एकतर्फी कालोपत्र गर्ने योजना रहेको छ ।

दाउन्नेको साँघुरो सडकमा कल्भर्ट निर्माण गर्दा सवारीसाधन एकतर्फी गर्नुपर्ने अवस्था रहेको भन्दै दाउन्नेसम्म कालोपत्र गर्न केही समय लाग्ने उनको भनाइ छ । सडक बिस्तारका लागि ग्रेडर, लोडर, एक्साभेटरसहित १८ स्थानमा पाँच सय ५० जना श्रमिकले काम गरिरहेका छन् ।सडक विस्तारपछि दुवैतर्फ सडकको चौडाइ सात÷सात मिटरको हुनेछ । बजार क्षेत्रमा ६÷६ मिटरको ‘सर्भिस लेन’ समेत निर्माण गरिनेछ । बजार क्षेत्रको १७.६ किलोमिटर सडकमा अतिरिक्त सर्भिस लेन निर्माण हुनेछ । बजार क्षेत्रमा सार्वजनिक सवारीसाधनले यात्रु चढाउन र ओराल्न सर्भिस लेन बनाइने योजनाले जनाएको छ । सडकको ४२.७ किलोमिटर खण्ड चार लेनको हुनेछभने दाउन्ने खण्डको पाँच किलोमिटर सडक तीन लेनको हुने जनाइएको छ ।

२२ माघ २०७५ मा सरकार र निर्माण कम्पनीबीच २२ साउन २०७९ भित्र काम सक्नेगरी ठेक्का सम्झौता भएको थियो । कुल एक सय १४ किलोमिटर सडकलाई गैँडाकोट–दाउन्ने (६५ किलोमिटर) र दाउन्ने–बुटवल (४९ किलोमिटर) गरी दुई खण्डमा विभाजन गरी आह्वान गरिएको ‘टेन्डर’ मा दुवै खण्ड निर्माणको जिम्मा चाइना स्टेट कन्स्ट्रक्सनले पाएको थियो ।
निर्धारित समयमा एक चौथाइ पनि काम नसकेपछि पहिलोपटक ८ साउन २०८०, दोस्रोपटक ८ साउन २०८१ सम्मका लागि म्याद थप गरिएको थियो । निर्माण कम्पनीले कोभिड, निर्माण सामग्रीको अभावलगायत विभिन्न समस्या देखाउँदै तीनपटकसम्म ठेक्का सम्झौताको म्याद थप गराएको छ । आगामी ८ साउनभित्र निर्माण सम्पन्न गर्नेगरी सरकारले तेस्रोपटक म्याद थप गरेको छ । म्याद थप गरिएको चार महिना काम नै नगरी समय बिताएको निर्माण कम्पनीलाई सरकारले कारबाही गर्ने गरी पत्राचार गरेपछि गत डिसेम्बरबाट पुनः काममा फर्किएको थियो ।