खोज

बुटवल, २२ माघ । फुटबल खेलको उर्वरभुमिका रुपमा परिचित रुपन्देहीमा लखन कप नकआउट फुटबल प्रतियोगिता २०८१ शुरु भएको हो । बुटवल उपमहानगरपालिकाको संरक्षकत्व तथा लखन ब्रदर्श यूथ क्लबको आयोजनामा मंगलबार भएको उद्घाटन खेलमा आयोजक लखन ब्रदर्श (सेतो)ले चादनी युवा क्लबलाई ५–१ गोल अन्तरले पराजित गर्दै विजयी शुरुवात गरेको छ ।

सिद्धेश्वर लाल कुमारी माबि खेलमैदान भएको खेलमा आयोजकको जितमा मिलन आले र प्रेम थापाले २–२ तथा समुन्द्र ज्ञवालीले थप एक गोल गरे । आयोजक टिमका मिलन आलेले खेलको २९ औ मिनेटमा गोल गर्दै खेलमा अग्रता दिलाए । यसैगरि प्रेम थापाले ३२ औ र ३७ औ मिनेटमा लगातार गोल थपे । दोस्रो हाफमा खेलको ४४ औ मिनेटमा मिलन आले र ७२ औ मिनेटमा समुन्द्र ज्ञवालीले गोल गर्दै अन्तरलाई बढायो । चादनीका विकास थापाले खेलको ६६ औ मिनेटमा सान्त्वना गोल गरे । खेलमा आयोजक टिमका मिलन आले म्यान अफ दी म्याचबाट पुरस्कृत भए । बुधबारको खेल सौभाग्य युवा क्लब र इभोलुसन क्लब अफ बुटवलका बिच हुने संयोजक राम बहादुर थापाले बताए ।

एक समारोहका बिच बुटवल उपमहानगरपालिकाका नगरप्रमुख खेलराज पाण्डेयले रेफ्रीलाई बल हस्तान्तरण गर्दै प्रतियोगिताको उद्घाटन गर्दै स्थानिय सरकारका खेल पूर्वाधारमा लगानी गरिरहेको बताए । विश्वमा नेपाललाई पहिचान दिलाउन सकिने खेल क्षेत्रमा लगानीको वातारण बन्दै गएको भन्दै यसमा बुटवल पछि नरहेको दाबी गरे ।

कार्यक्रममा नगर खेलकुद विकास समितिका संयोजक बोनिन पिया, वडा नं ८ का वडाअध्यक्ष यज्ञ प्रसाद पंगेनीले खेलको उर्वरभुमि बुटवलमा खेलकुद विकासका धेरै योजनाहरु तयार गरिरहेको बताए ।

कार्यक्रममा क्लबका अध्यक्ष सुदिप खत्रीले खेल पूर्वाधारलाई संरक्षणमा स्थानिय पालिकाबाट पहल जरुरी रहेको भन्दै मैदान मर्मत र संरक्षणमा स्थानिय क्लबलाई नै जिम्मेवार बनाउदा प्रभावकारी हुने बताए । छोटोसमयमा क्लबका सदस्यहरुको श्रमदानबाट मैदानलाई तयार गरेको स्मरण गर्दै उनले सामाजिक क्षेत्रमा श्रमदान गरेर चर्चामा आएको क्लब खेल विकासमा अग्रसरता देखाउन लागेको उनले बताए । फुटबल खेलको हबका रुपमा रहेको रुपन्देहीमा फुटबलका प्रेमी र पूर्व खेलाडीहरुबाट स्थापना भएको आफनो क्लबबाट नया फुटबल प्रतियोगिता आयोजना गर्न लागेको उनले बताए ।

प्रतियोगिताको उपाधि विजेता टिमले नगद १,५१,५१५ रुपैया, कप, मेडल, प्रमाणपत्र तथा उपविजेता टिमले नगद ७५,७५७ रुपैया, कप, मेडल, प्रमाणपत्रबाट पुरस्कृत गरिने क्लबका सचिव निरन्जन पन्तले बताए । यसैगरि विधागत रुपमा सर्वोत्कृष्ट खेलाडीलाई नगद १०, ५०० सहित अन्य चार जना उत्कृष्ट खेलाडीहरुलाई नगद ५,५५५ रुपैया, कपबाट पुरस्कृत गरिने उनले बताए । फागुन ७ गतेसम्म चल्ने प्रतियोगितामा १६ टिमले भाग लिएका छन भने १५ लाख खर्च हुने अनुमान आयोजकको छ ।