काठमाडौं, २१ माघ ।
प्रधानमन्त्री केपी शर्मा ओलीले सबैले आत्मविश्वासका साथ काम गरेमा अब नेपाल पछाडि पर्नु पर्ने कुनै कारण नरहेको बताएका छन्।k
श्रीपञ्चमीका अवसरमा फिनिक्स इस्पिरेसन र इम्प्रेरियल वल्ड स्कुलद्वारा आयोजित ‘युवा अन्तक्र्रिया कार्यक्रम’ मा बोल्दै प्रधानमन्त्री ओलीले विकासका पूर्वाधार तयार गर्दै र आधुनिक गुणस्तरीय शिक्षा प्रदान गरेर युवाहरुलाई विश्व बजारको प्रतिस्पर्धी बनाउने संकल्प पनि व्यक्त गरेका छन्।
प्रधानमन्त्री ओलीले भने, “विदेशमा गएर नेपाली युवाले अरुका देश बनाएका छन्। अब हामीले आफ्नै देश बनाउन ध्यान दिनुपर्छ। हामीसँग एक करोड युवा अहिले पनि स्वदेशभित्रै छन्। त्यसैले अब हामी हाम्रो देश बनाउँछौं।”
उनले विद्यार्थिहरुलाई आग्रह गर्दै थपे, “यस देशबाट गरिबी समाप्त पार्नुपर्छ। देशको स्वाधीनताको झण्डा झुक्न दिन हुँदैन र देशलाई समृद्ध नेपाल बनाउनुपर्छ।”
प्रधानमन्त्री ओलीले नेपालको पुराना ज्ञानभूमि र तपोभूमिको महत्त्व र पुर्खाको गौरवगाथालाई स्मरण गराउँदै विद्यार्थीहरुलाई देशभक्तिको भावना बोकेर इमानदार बनेर सफलतामा पुग्न सकिने सुझाव दिए। उनले विद्यार्थीहरुलाई असल नेपाली संस्कार पछ्याउने र अरुको बहकाबमा नलाग्ने तर्क गरे।
नेपाल र चीनबीचको सम्बन्धबारे एक विद्यार्थीको प्रश्नमा प्रधानमन्त्री ओलीले नेपालले चीन, भारत लगायत विभिन्न देशसँग मित्रवत् सम्बन्ध राख्दै आएको बताउँदै हालैको औपचारिक चीन भ्रमणमा विभिन्न सहकार्य विस्तार भएको जानकारी पनि दिएका छन्।
नेपालको भविष्यका लागि सबैभन्दा ठूलो सपना के हो भन्ने प्रश्नमा, प्रधानमन्त्री ओलीले ‘समृद्ध नेपाल, सुखी नेपाली’ नै आफ्नो सबैभन्दा ठूलो सपना रहेको स्पष्ट पारे।
विद्यार्थीहरुले विभिन्न रुचिका विषयमा पनि प्रश्न गरेका थिए, जसका जवाफ प्रधानमन्त्री ओलीले दिएका थिए।
