खोज

काठमाडौं, २१ माघ ।

नेकपा एमालेका युवा नेता महेश बस्नेतविरुद्ध रवि लामिछानेको समूह लागेको आरोप लागेको छ ।नेपाल युवा संघका महासचिव सुमन पुरीले ‘झुटा आरोप’ ठाउँ-ठाउँबाट अयोग्य साबित हुँदा पनि अझै शोभा पाठकलाई प्रयोग गरिरहेको पुरीको आरोप छ ।‘६ महिना अगाडि नै नेकपा एमालेका युवा नेता महेश बस्नेतविरुद्ध शोभा पाठकले हालेको उजुरीमा उच्च अदालतले दाबी नपुग्ने ठहर गरेको थियो। प्रमाण अभावका कारण प्रहरी र सरकारी वकिलले उक्त उजुरी तामेलीमा राख्ने निर्णय गरे, जुन अदालतले सदर गरिसकेको छ’ उनले भनेका छन्।

भारतको अस्पतालमा पाठकको उपचारको क्रममा जबर्जस्ती पति उल्लेख गर्न लगाएको पुरीले जनाएका छन्। सो कार्यका लागि राष्ट्रिय स्वतन्त्र पार्टीका सभापति रवि लामिछानेको समूह लागेको उनको दावी छ। ‘तर, तीन महिना अगाडि षड्यन्त्रकारीहरूले नयाँ नाटक गरे। रवि लामिछानेको आदेशमा राजिव खत्री, निकिता पौडेल र ज्वाला संग्रौलाले मिलेर नेपाल महिला संघ, ललितपुरकी शर्मा नामकी महिलालाई प्रयोग गरी हरियाणा, भारतसम्म पुर्याए। त्यहाँ ५ हजार घुस खुवाएर तुलसी मेन्टल अस्पतालमा मानसिक उपचार गराएको नाटक गरे। त्यही अस्पतालको कागजातमा पति महलको स्थानमा महेश बस्नेतको नाम लेखाइयो,’ पुरीले भनेका छन्, ‘पछि, सुरेन्द्र भण्डारीमार्फत उक्त नक्कली कागजातलाई पुरक प्रमाण भन्दै प्रहरीसमक्ष बुझाइयो। तर, प्रहरी र सरकारी वकिलले गहिरो अनुसन्धान गर्दा यो झूठो र षड्यन्त्रपूर्ण योजना भएको पुष्टि भईसकेको छ।’

शोभा पाठकले लगाएको आरोपमा कुनै सत्यता नभएको महासचिव पुरीको दावी रहेको छ। ‘यसअघि पनि भारतमा बनाइएका नक्कली सर्टिफिकेटका आधारमा जागिर खाएका सेना, प्रहरी, र कर्मचारीहरूको जागिर अख्तियारले खोसिसकेको छ। तर, अब झूठा प्रमाण र षड्यन्त्रको आधारमा महेश बस्नेतको उर्जावान राजनीति समाप्त पार्ने सपना देख्ने षड्यन्त्रकारीहरूको अन्त्य हुने छ।’राजिव खत्री, ज्वाला संग्रौला, शोभा पाठक र उनीहरूका मतियारहरूले षड्यन्त्र र हनी ट्र्यापको माध्यमबाट एमालेका युवा नेतालाई फसाउने दुष्प्रयास गरेका छन्। अब यी सबै अपराधीहरूमाथि कडा कानुनी कारबाही हुनुपर्छ। एमालेका नेताविरुद्ध षड्यन्त्र गर्नेहरूका दिवासपना चकनाचुर हुनेछन।