खोज

काठमाडौं २१, माघ
जनता समाजवादी पार्टी, नेपालको केन्द्रीय कार्यकारिणी समितिमा १० जना थप्ने प्रस्ताव भएको छ।

शनिबार देखी पार्टी केन्द्रीय कार्यालय बालकुमारीमा सुरु भएको बैठकमा १० जना थप केन्द्रिय कार्यकारिणी सदस्य थप गर्ने प्रस्ताव गरिएको हो।

तर, जारी बैठकमा सैद्धान्तिक सहमति जुटाएर केन्द्रीय समितिबाट अनुमोदन गराउने गरी सो प्रस्ताव पेश भएको हो। हाल कार्यकारिणी सदस्यको संख्या ३१ रहेको छ। यो बैठकबाट प्रस्ताव अनुमोदन भएमा कार्यकारिणी समितिको संख्या ४१ सदस्यीय हुनेछ।

साथै, जारी बैठकमा पार्टीको केन्द्रीय विभाग तथा सल्लाहकार समितिलाई पूर्णता दिने, आगामी संगठनात्मक र राजनीतिक कार्यक्रम तथा कार्ययोजनामा छलफल चलिरहेको जनाइएको छ।

बैठकमा समसामयिक राष्ट्रिय राजनीतिक विषयसहित पार्टीको संगठनात्मक कार्यदिशाबारे छलफल भइरहेको छ। साथै, करिब ६ महिनादेखि पार्टीले सञ्चालन गर्दै आएको ‘जनतासँग जसपा नेपाल, संगठन निर्माण अभियान’ को बृहत् समीक्षा समेत भइरहेको छ।

यस अघिको बैठकले केन्द्रदेखि वडास्तरसम्म जारी संगठन निर्माण अभियान कार्यकर्ता र जनतामाझ अत्यन्तै लोकप्रिय, प्रभावकारी र उत्साहजनक रहेको निष्कर्ष निकाल्दै पौष र माघ मसान्तसम्मको लागि अभियानको समयावधि थप गरेको थियो। कार्यकारिणी समितिका पदाधिकारी तथा सदस्यलाई तोकिएको जिम्मेवारी अनुसार आ-आफ्नो कार्यक्षेत्रअन्तर्गत गरेका कार्यहरूको प्रगति विवरणको लिखित प्रतिवेदनसहित बैठकमा अनिवार्य उपस्थित हुन भनिए अनुसार रिपोर्टहरू प्रस्तुत भइरहेका छन्।

शनिबार र आइतवार बोलि नभ्याएका केन्द्रीय कार्यकारिणी समितिका बाँकी नेताहरूले अहिले धारणा राखिरहेका छन्। साथै, मधेशकेन्द्रित दलहरू संयुक्त मोर्चा बनाएर सडकदेखि सदनसम्म संघर्ष गर्ने अन्तिम तयारी गरिरहेको बेला सो विषयमा पनि जसपा नेपालको कार्यकारिणी बैठकमा छलफल चलिरहेको छ।