खोज

चन्द्रौटा, २० माघ ।
कुनै तालिमपछि रोजगारी र आम्दानीको पाटोसँग जोडिनुपर्छ भन्ने सबैको मनमा हुन्छ । तर जोडिरहेको कमै भेटिन्छ । तर कपिलवस्तुको एक महिला समूहले कठिन परिस्थितिलाई सहज तुल्याउँदै उद्यम गरी उदाहरण दिएको छ । शिवराज नगरपालिका वडा नम्बर–३, का ५० जना महिलाहरूले करिब एक बर्ष अघि अचार बनाउने ५ दिनको तालिम लिएका थिए ।ती तालिम लिएकामध्ये ५ जना मिलेर सामूहिक रूपमा अचार व्यावसायमा लागेका छन् । उनीहरू घर परिवारको जिम्मेवारी सम्हाल्दै समय निकालेर अचार उत्पादन गरी गरिरहेका छन् । घरपरिवारसँगै श्रीमानको बोझ कम गर्दै रोजगारीसँगै आम्दानीको पाटोमा लागेको सञ्चालक जानुका भुसाल बताउँछिन् । उनका अनुसार यतिबेला उनीहरू दैनिक १० देखि २० किलो आचार उत्पादन गर्ने गरेका छन् ।

अकबरे खुर्सानी, लसुन, आँप, मेथी, मासु लगायतका आचार उत्पादन गरिरहेको सञ्चालक भुसालले बताइन् । घर गृहिणीको काम सकाएर रोजगारीसँग जोडिएर सामूहिकरूपमा काम गर्न पाउँदा आफू निकै खुसी भएको उनको दाबी छ । समाजका अग्रज व्यक्तित्वसँग चिनजानसँगै अचार व्यवसायबाट आम्दानीको प्रत्यक्ष लाभ लिन पाउँदा खुसीको लागेको उनले जनाईन् ।“पहिले हामीले बाहिर बिक्री गर्न सम्भव होला भनेर सोचेका थिएनौँ । तर, अहिले स्थानीय बजारमै राम्रो माग छ” आचार व्यवसाय सञ्चालक भुसालले भनिन् । घरायसी काम सकेपछि सामूहिक रूपमा व्यवसायमा संलग्न हुँदा आत्मनिर्भर बन्न पाएकोमा उनी खुशी छिन् । समूहले भविष्यमा उत्पादन वृद्धि गर्दै अन्य महिलालाई पनि रोजगारी सिर्जना गर्ने लक्ष्य राखेको छ ।

“महिलाले आर्थिक रूपमा आत्मनिर्भर बन्न सक्दा मात्र समाजमा सशक्तीकरण सम्भव छ”, भुसाल भन्छिन् । दैनिक महोत्सवमा आउने दर्शकहरूलाई उद्यमी महिलाहरूले उत्पादन गरेका अर्गानिक अचार उनीहरूको स्वादको मुख्यआकर्षणको केन्द्रबिन्दु समेत बनेको छ । उनीहरूले यसअघि खरेन्द्रपुरमा अचार उत्पादन गरी सामाजिक सञ्जालमार्फत ग्राहकको माग अनुसार होम डेलिभेरी गर्ने गरेका छन् ।

स्थानीय उत्पादनलाई स्थानीय सरकारले प्रभावकारी रूपमा सहजीकरण गरेको समुहकी अर्की सदस्य ममता खनालले बताईन् । उत्पादनमूलक कार्यमा महिलालाई प्रोत्साहन गर्न सरकारले समेत अझ प्रभावकारी भूमिका खेल्न आवश्यक रहेको उनको भनाई छ । स्थानीय उत्पादनलाई प्रवद्र्धन गर्न स्थानीय सरकारको सहयोग प्रभावकारी भएको खनाल बताउँछिन् । उनले भनिन्: “महिलाहरूलाई आर्थिक रूपमा सक्षम बनाउन अझ बढी सहुलियत योजना आवश्यक छ” ।
यहि माघ ९ गते देखि व्यापार संघ कपिलवस्तुको आयोजनामा सञ्चालन रहेको ९औँ चन्द्रौटा कृषि, पर्यटन तथा औद्योगिक महोत्वमा व्यापारिक स्टल राखिएको खनालले जनाईन् । महोत्सवमा २७ नम्बर स्टलमा शिवराज महिला उद्यमी अचार समूको स्टलमा आएर अचारको स्वाद लिन आग्रह समेत उनले गरिन् । मेलामा दैनिक करिब १५ हजार रकम बराबरको कारोबार हुने गरेको उनले जिकिर गरिन् ।उनीहरूले उत्पादन गरेको अचार २ सय देखि एक हजार ५ सयसम्मका एक पाउदेखि १ केजीको प्याकेजमा स्थानीय बजारमा उपलब्ध रहेको समूहले जनाएको छ । सम्बन्धित निकायले थप तालिम प्रदान गरे व्यापकरूपमा जिल्ला बाहिरसमेत व्यापार गर्ने उनीहरूको योजना छ ।