खोज

बुटवल, १९ माघ ।

जिल्लास्तरीय अन्तर विद्यालय आधुनिक गायन प्रतियोगिता ‘दीप गायन तारा’ को बाह्रौंं संस्करण यही माघ २५ र फागुन ५ गते हुने भएको छ ।

बुटवल सुख्खानगरस्थित दीप बोर्डिङ स्कुलको आयोजनामा हरेक वर्ष आयोजना हुँदै आएको प्रतियोगितामा रुपन्देहीका सरकारी र निजी विद्यालयका कक्षा १० सम्मका विद्यार्थीले भाग लिन पाउने छन् ।

प्रतियोगिताको उपाधि विजेतालाई नगद ३० हजार, उपविजेतालाई २० हजार र तेस्रो हुनेलाई नगद १० हजारसहित शिल्ड र प्रमाणपत्र दिइने विद्यालयका प्राचार्य टिकाराम न्यौपानेले बताए ।

यस्तै प्रतियोगितामा सान्त्वना हुने दुई जनालाई नगद दुई–दुई हजार दिइने विद्यालयका प्राचार्य टीकाराम न्यौपानेले जानकारी दिए ।

प्रतियोगितामा ४० जना भन्दा बढीले भाग लिनेछन् । प्रतियोगिताको पहिलो चरण माघ २५ र अन्तिम चरण फागुन ५ गते हुने छ । प्रतियोगितामा भाग लिन दर्ता शुल्क एक हजार रुपैयाँ तय गरिएको न्यौपानेले बताए । विजेतालाई विद्यालयको ४४ औं स्थापना दिवसका अवसरमा पुरस्कृत गरिने छ ।

प्रतियोगिताका लागि पहिलो चरणमा प्रतियोगीले ट्रयाकबिना गीत गाउनु पर्ने छ भने यस चरणबाट उत्कृष्ट २० जनालाई दोस्रो चरणका लागि छनोट गरिने छ । त्यस्तै फागुन ५ गते प्रथम चरणबाट छानिएका उत्कृष्ट २० जनाले ट्रयाकसहित गीत गाउनु पर्ने छ भने यस चरणबाट छनोट भएका उत्कृष्ट पाँच जनालाई पुरस्कृत गरिने छ । यो चरणमा प्रतियोगीले ट्रयाकसहित एउटा राष्ट्रिय गीत र एउटा स्वेच्छिक गीत गाउनु पर्ने छ ।

प्रतियोगिताबारे जानकारी गराउन शनिबार विद्यालयमा आयोजित पत्रकार सम्मेलनमा बोल्दै प्राचार्य न्यौपानेले विद्यार्थीको सर्वाङ्गिण विकासका लागि पाठ्यपुस्तकभन्दा माथि उठेर यस्ता गतिविधि सञ्चालन गर्दै आएको जानकारी दिए ।

विद्यालय व्यवस्थापन समितिका अध्यक्ष राजेन्द्रप्रसाद ध्वजूले अतिरिक्त क्रियाकलापहरुलाई प्राथमिकतामा राख्दै आएका कारण दीप गायन तारालाई निरन्तरता दिन सकिएको बताए ।

नेपाल पत्रकार महासंघ रुपन्देहीका अध्यक्ष दिनेश पाण्डेले दीप गायन ताराले महत्वपूर्ण कलाकारहरु उत्पादन गर्न सफल भएको भन्दै दीप बोर्डिङ शैक्षिण गुणस्तरमा उत्कृष्ट रहेको र यसले अतिरिक्त क्रियाकलापमा देखाएको सक्रियताको प्रशंसा गरे ।

प्रतियोगिताबाट हालसम्म अस्मिता चापागाईं, प्रिया भण्डारी, अक्सर अली, जुना गुरुङ, नवीन परियार, दिप्सन श्रेष्ठ, वर्षा परियार, सक्सेस पाण्डे, कुशल आचार्य, विवेक पंगेनी र रिदिमा सिंजाली गरी ११ जना विद्यार्थीहरु हालसम्म दीपगायन तारा बन्न सफल भएका छन् । ती विद्यार्थीहरु हाल राष्ट्रिय कलाकारिताका क्षेत्रमा स्थापित भएको विद्यालयका शिक्षक छवि ज्ञवालीले बताए ।