खोज

चन्द्रौटा(कपिलवस्तु), १९ माघ ।

कपिलवस्तुमा तीन जना भारतीय पक्राउ परेका छन् । अनलाइन जुवा र क्रिप्टोकरेन्सीको कारोबार गरी ठगी गरेको आरोपमा शिवराज नगरपालिका–१, शिवपुर स्थित होटेल हाईवेबाट विशेष सुरकीको आधारमा वडा प्रहरी कार्यालय चन्द्रौटाको कमान्डमा खटिएको प्रहरीले उनीहरुलाई पक्राउ गरेको हो ।

प्रहरी कार्यालय चन्द्रौटाका अनुसार प्रहरीले चलाएको स्वीप अप्रेसनको क्रममा होटेल चेकजाँच गर्दा २४ थाना मोबाइल, ल्यापटप लगायतका सामग्री सहित उनीहरुलाई पक्राउ गरेको हो । पक्राउ पर्नेमा भारत राजस्थान जयपुर ग्राम घर नम्बर २५ गोबरधनधाम लोनियाबासका ३० वर्षीय बिजेन्द्र कुमार सैनी, दोसावान्ता कुईग्रामका २२ वर्षीय मोनु सैनी र ३५ वर्षीय नन्दलाल सैनी रहेका छन् ।

उनीहरुले मेस्क अप्लीकेशनबाट बिटक्वाईन÷युएसडीटी को माध्यमबाट सट्टेबाजी र जुवा खेलाई ठगी गरिरहेको प्रहरीले जनाएको छ । होटलमा यही माघ ९ गतेदेखि भाडामा बस्दै आएको अनुसन्धानको क्रममा खुलेको छ । उनीहरूबाट विभिन्न कम्पनीका २४ थान मोबाइल डेल कम्पनीको ल्यापटप, मल्टिमिडिया २ थान, चार्जर ६ थान बरामद गरिएको जनाइएको छ ।

प्रहरी उपरीक्षक निरन्जनदत्त भट्टका अनुसार उनीहरूमाथि मुलुकी अपराध संहिता २०७४ को परिच्छेद २२ को दफा २६२ को (क) बमोजिम अभौतिक मुद्रा प्रयोग गर्न नहुने कसुरमा अदालतबाट ७ दिनको म्याद थप गरी अनुसन्धान प्रक्रिया अघि बढाइएको प्रहरीले जनाएको छ ।