खोज

लुम्बिनी प्रदेश विविधताले भरिपूर्ण छ । यहाँको भौगोलिक अवस्थिति र हावापानीमा समेत विविधता पाईन्छ । यस प्रदेशमा हिमाल, पहाड, शिवालिक र तराई क्षेत्र पर्दछन । रुकुम पूर्वको सिस्ने हिमशृंखला यसै प्रदेशमा पर्दछ । लुम्बिनी प्रदेशमा ३.३१ प्रतिशत भूभाग हिमाली क्षेत्र, ९.१ प्रतिशत भूभाग उच्च पहाडी क्षेत्र, ३२.२ प्रतिशत भूभाग मध्यपहाडी क्षेत्र, २७.९ प्रतिशत भूभाग शिवालिक क्षेत्र र २७.६ प्रतिशत भूभाग तराई क्षेत्रमा पर्दछ ।

लुम्बिनी प्रदेशलाई पर्यटकीय दृष्टिकोणले उर्वर मानिन्छ । रोल्पा रुकुमको पर्यापर्यटनले यहाँ आउने पाहुनाहरूलाई लोभ्याउने गर्दछ । रुकुमपूर्वका प्रमुख पर्यटकीय स्थलहरूमा पुथा हिमाल, सिस्ने हिमाल, कमलताल, पुपाल दह, सुन दह, गुप्तातह, सम्पे ताल, देउराली गुफा, तकसेरा गाउँ, लुकुम गाउँ, रांसी गाउँ, कोल गाउँ, हुकाम मैकोट, महतसिमा गाउँका मगरबस्ती, रुकुमकोट र ढोरपाटन वन्यजन्तु आरक्षण, यहाँका पर्यटकीय क्षेत्र अन्तर्गत पर्दछन् । यसका साथै वराहमन्दिर, शिवजी मन्दिर,विन्धवासीनि मन्दिर आदि यहाँका पर्यटकीय क्षेत्र हुन ।रोल्पा जिल्लाका प्रमुख पर्यटकीय स्थलहरूमा जलजला हिमाल, राक्माधुरी चुचुरो, सुन छहरी झरणा, जेल्वाङ मगरवस्ती, थवाङ गाउँ आदि पर्दछन । यसका साथै शिवपंचायन खुंग्री, शिव गुफाजुगार, स्वर्गद्वारी महाप्रभुको जन्मस्थल रुन्टी जस्ता धार्मिक पर्यटकीय क्षेत्र पर्दछन् ।
यी जिल्लाको उच्च पहाडी र हिमाली क्षेत्रमा हिउँदे सिजनमा हिउँले सेताम्य ढाक्ने गर्दछ । हिउँ परेको समयमा यहाँका हिउँ खेल्न आउनेहरूको संख्या समेत बढ्दै जान थालेको छ । यी क्षेत्रहरू हिउँ पर्यटनको संभावना वोकेका क्षेत्र हुन । रुकुमपूर्वको सिस्ने हिमाल र पुथा हिमाल बाह्रै महिना हिउँले ढाक्ने गर्दछ । सेताम्य हिउँले ढाकेका यी हिमचुचुराहरू मनमोहक र आकर्षक देखिन्छन् ।

रोल्पाको जलजला पहाड लुम्बिनी प्रदेशको एक महत्वपूर्ण पर्यटकीय गन्तव्य हो । जलजला क्षेत्र समुन्द्र सतहदेखि ३ हजार ५७६ मिटर उचाईमा रहेको अवस्थित छ । जलजला क्षेत्र रोल्पाको थवाङ गाउँपालिका, रोल्पा नगरपालिका र सुनछहरी गाउँपालिकाको संगम मानिन्छ । जैविक विविधता र प्राकृतिक सौन्दर्यले भरिपूर्ण जलजला क्षेत्र पृथक र विशिष्ट ऐतिहासिक पहिचान बोकेको ठाउँ पनि हो । सामाजिक, साँस्कृतिक, भाषिक तथा धार्मिक सम्पदालाई जीवित राख्दै आएको जलजला क्षेत्रमा प्राकृतिक, धार्मिक, सांस्कृतिक र युद्ध पर्यटनको प्रचुर सम्भावना वोकेको छ । पछिल्ला दिनमा जलजला क्षेत्रमा हिउँ खेल्न जानेहरूको समेत संख्या बढ्न थालेको छ । हिउँदमा यहाँ पर्ने हिउँले पर्यटकलाई आकर्षित गरिरहेको छ । हिउँमा रम्न चाहाने पर्यटकहरू जलजलामा हिउँ खेल्न पुग्दछन् ।

जलजलामात्र हैन रोल्पा सदरमुकाम लिवाङको नजिक दुरीमा रहेको सातदोबाटो क्षेत्र पनि हिउँ पर्यटनको संभावना बोकेको क्षेत्र हो । जिल्ला सदरमुकाबवाट करिब १० किलोमिटरको दुरीमा रहेको सातदोबाटो क्षेत्र चकचके लिवाङ सडक खण्ड संग जोडिएको हुँदा पछिल्ला दिनमा यहाँ हिउँमा रम्न चाहानेहरूको चहलपहल बढ्दै जान थालेको छ । सातदोवाटो क्षेत्र २०३२ मिटर उचाईमा अवस्थित छ भने सातदोबाटो क्षेत्रका डाँडापाखाहरू करिब २ हजार ५ सय मिटर सम्म उचाईमा रहेका छन । रोल्पा नगरपालिकाले निर्माण गरेको ११० फुट अग्लो भ्यूटावरका साथै रक गार्डेन समेत सातदोबाटो क्षेत्रमा पर्ने भएकाले यहाँ पर्यटकको चहलपहल विशेष रूपले हुँदै आएकोमा हिउँ खेल्न आउनेहरूको संख्यामा समेत वृद्धी भइरहेको छ । सातदोतबाटो क्षेत्रमा हिउँ खेल्न रोल्पा जिल्लाका विभिन्न क्षेत्रका साथै सिमावर्ती क्षेत्र प्यूठानबाट समेत आन्तरिक पर्यटकहरू आउने गर्दछन् ।