खोज

वासिङ्टन डिसी, १७ माघ ।

मार्क जुकरबर्गको कम्पनी मेटालाई अमेरिकी राष्ट्रपति डोनाल्ड ट्रम्पसँगको सम्बन्ध बिगार्ने कार्य निकै महँगो साबित भएको छ।अब मेटाले राष्ट्रपति डोनाल्ड ट्रम्पलाई २०२१ मा दायर गरेको मुद्दा सुल्झाउन २५ मिलियन डलर तिर्नु पर्ने भएको छ। यसमा ट्रम्पले अमेरिकाको क्यापिटल दंगा पछि फेसबुक र इन्स्टाग्रामले आफूलाई गलत तरिकाले सेन्सर गरेको दाबी गरेका थिए।

अमेरिकी अखबार वाल स्ट्रिट जर्नलले यस सम्झौताका बारेमा जानकारी दिएको छ, रिपोर्टमा यसलाई ट्रम्पको विजयको रूपमा देखाइएको छ। सम्झौतासँग परिचित व्यक्तिहरूका अनुसार भुक्तानीको २२ मिलियन डलर ट्रम्पको भावी राष्ट्रपति पुस्तकालयको लागि कोषमा जानेछ, जबकि बाँकी रकमले कानूनी शुल्क र मुद्दामा अन्य वादीहरूलाई भुक्तानीहरू कभर गर्नेछ।

जनवरी ६, २०२१ मा ट्रम्प समर्थकहरूले सिर्जना गरेको कोलाहल पछि उनको सोशल मिडिया खाता निलम्बित गरिएको थियो। त्यसपछि ट्रम्पले एकाउन्ट निलम्बन गरेको भन्दै सोसल मिडिया प्लेटफर्मको कडा आलोचना गरेका थिए, तर हालै जुकरबर्ग र एक्सका मालिक एलोन मस्क लगायतका धेरै टेक दिग्गजहरूले ट्रम्पसँग हात मिलाइसकेका छन्। मार्क जुकरबर्गले गत हप्ता वाशिंगटनमा ट्रम्पको राष्ट्रपतिको उद्घाटन समारोहमा भाग लिएका थिए।

अमेरिकामा राष्ट्रपति चुनावका क्रममा एलन मस्कसँगै मेटाका मालिक जुकरबर्गले पनि ट्रम्पलाई समर्थन गरेका थिए। ट्रम्पले आफ्नो कार्यकालमा अमेरिकी कम्पनीहरूलाई अगाडि बढाउन धेरै वाचा गरेका थिए, त्यसपछि अधिकांश व्यवसायी ट्रम्पको समर्थनमा आएका थिए।

मेटा ट्रम्पलाई भुक्तानी गर्ने पहिलो कम्पनी भने होइन, गत डिसेम्बरमा एबीसी न्यूजले ट्रम्पद्वारा दायर गरेको मानहानि मुद्दालाई सुल्झाउन १५ मिलियन तिर्न सहमत भएको थियो। च्यानलका शीर्ष एंकरले ट्रम्पको बारेमा गरेको टिप्पणीलाई लिएर यो मुद्दा दायर गरिएको थियो।