काठमाडौँ, १६ माघ ।
प्रधानमन्त्री केपी शर्मा ओलीले राजनीतिसहित समाजका हरेक क्षेत्रमा सुधारको आवश्यकता औंल्याउँदै कुनै ‘स्टन्ट’बाजीबाट देश चल्ने छैन भन्ने धारणा व्यक्त गरेका छन्। नेपाल बार एसोसिएसन र युवा कानुन व्यावसायी सरोकार समाजद्वारा आयोजित पहिलो युवा कानुन व्यावसायी सम्मेलन, २०२५ को उद्घाटनसत्रलाई सम्बोधन गर्दै उनले जनताप्रति इमान्दारिता र बफादारिताका साथ हरेक व्यक्तिले आफ्नो कर्तव्य पूरा गर्नुपर्नेमा जोड दिएका छन्।
प्रधानमन्त्री ओलीले भने, “हामीले राजनीतिक दलहरूको नेतृत्व र जनताको सहभागितामा लोकतन्त्र ल्याएका हौं, अब शान्तिसुरक्षा, सुशासन र समृद्धिको लागि सबैले कटिबद्ध हुनु आवश्यक छ।”
सांसदहरूले कानुन बनाउँदा जनताको पक्षमा काम गर्दै, सार्वभौमसत्तासम्पन्न जनताको तर्फबाट काम गर्ने कुरा हेक्का राख्नुपर्ने र सरकारले ‘म म सबै कुरा हुँ’ भन्ने भ्रम पाल्न नहुने स्पष्ट पारे। उनले थपे, “संसद्ले न्यायपूर्ण कानुन बनाउनुपर्छ, र सम्बन्धित निकायहरूले त्यसअनुसार काम गर्नुपर्छ। लोकतन्त्रमा आफैले कानुनको पालना गर्ने अभ्यास थप महत्वपूर्ण छ।”
प्रधानमन्त्री ओलीले सरकारको उद्देश्य देशलाई सुशासन, भ्रष्टाचारमुक्त, समृद्ध र सुखी नेपाली बनाउने रहेको बताउँदै कानुन व्यवसायीहरूको सक्रिय सहभागिता आवश्यक रहेको विश्वास व्यक्त गरे।
यस अवसरमा, प्रधानमन्त्री ओलीले सम्मेलनका निष्कर्षहरूको कार्यान्वयनका लागि सरकारको तर्फबाट समर्थन गर्ने वचन दिएका छन्। उनले युवा कानुन व्यवसायीहरूको न्यूनतम पारिश्रमिकको अवस्था सुधार्नुपर्ने पनि बताए।
कार्यक्रममा अन्तर्राष्ट्रिय क्षेत्रका प्रतिनिधिहरूले पनि सम्बोधन गरेका थिए र युवा कानुन व्यावसायी सर्वेक्षण प्रतिवेदन सार्वजनिक गरिएको थियो।
