खोज

बुटवल, १३ माघ । खेल र खेलाडीहरुको पक्षमा सरोकारावाला खेल संघ जिम्मेवार हुनुपर्ने राष्ट्रिय खेलकुद परिषदका नवनियुक्त उपाध्यक्ष ध्रुव आचार्यले बताएका छन । खेलाडी, प्रशिक्षकहरुको समस्या पहिचान गरेर सरोकारवाला संघ र महासंघमार्फत सरकारमा जोड्ने काम हुनुपर्ने उनले बताए । रुपन्देही जिल्ला शारिरिक सुगठन तथा फिटनेश संघले आईतबार बुटवलमा आयोजना गरेको बधाई तथा सम्मान कार्यक्रममा उनले खेल संघको नाममा पद हत्याउने तर आफनो खेल क्षेत्रको बारेमा माखो नमार्ने संस्थाहरुलाई पहिचानमा राखिएको बताए ।

‘संघ बिनाको महासंघ बन्ने गलत बाटोलाई अन्त्य गर्छु ।’–उनले प्रतिवद्घता जनाए । संघ नबिकरण नभएको तर त्यसको महासंघमा नेतृत्व गरेर बस्ने परिपार्टीलाई अन्त्य गर्ने गरि काम भैरहेको उनले बताए । अरु खेललाई निषेध गर्नेभन्दा पनि आफ्नो खेललाई प्रमोशन गर्नतर्फ ध्यान दिन उनले निर्देशन दिए । ‘खेल लयमा आउने गरि काम गरौ ।’– उनले भने । आआफनो खेल क्षेत्रमा देखिएका समस्या बाहिर ल्याउन आग्रह गर्दै उनले समस्या बाहिर आएमात्र त्यसको समाधानको बाटो खुल्ने तर्क राखे । शारिरिक सुगठनभित्र धेरै विधा रहेको र ठुलो लगानी क्षेत्र भएको उनले बताए । उनले निजि लगानीमा नै धेरै खर्च गरेर अन्तराष्ट्रिय स्तरसम्मका प्रतियोगितामा खेलाडीहरुको सफलता पाएको उनले बताए । खेलाडीहरु आफ्नो अनुशासनलाई पहिलो ध्यान दिनुपर्ने उनले सुझाव दिए । सबै खेलहरुलाई समेटेर खेल अभ्यासलाई निन्तरता दिने सके त्यसबाट पदकको निरन्तरता रहने समेत बताए ।

एक समारोहका बिच संघका अध्यक्ष राजकुमार श्रेष्ठ, संस्थापक अध्यक्ष शिवध्वज राई, शारीरिक सुगठनका प्रशिक्षक केशव शाक्य, नेपाल खेलकुद पत्रकार संघ रुपन्देहीका अध्यक्ष सुमन अधिकारीले राखेपमा नवनियुक्त उपाध्यक्ष ध्रुव आचार्यलाई माला, खादा र मायाको चिनोबाट सम्मान गरेको हो ।

कार्यक्रममा रुपन्देही जिल्ला शारिरिक सुगठन तथा फिटनेश संघका अध्यक्ष राजकुमार श्रेष्ठले धेरै मेहनत लाग्ने र खर्चिलो खेलको रुपमा चिनिएको शारीरिक सुगठनमा सरकारको नजर जान नसकेको दुखेसो गरे । सरकारले खेलाडीहरुको पहिचान गरि आवश्यक सम्मान दिन उनले आग्रह गरे । शारिरिक सुगठन र पावर लिफटिङ दुई मुख्य विधाहरु रहेको भन्दै उनले राष्ट्रिय र अन्तराष्ट्रिय स्तरमा यो खेलबाट धेरै सफलता हात पारेको बताए ।

कार्यक्रममा यस क्षेत्रका अन्तराष्ट्रिय खेलाडी कृष्ण प्रसाद श्रेष्ठले शारीरिक सुगठनमा आवद्ध भएर खेल जीवनमा भोकेका अनुभवलाई सुनाउदै अहिले शारीरिक सुगठनमा सरकारको लगानी गर्ने सहि समय आएको बताए ।