खोज

जितपुर, ११ माघ ।

भूमि सम्बन्धी समस्या समाधान आयोग कपिलवस्तुका अध्यक्ष झविलाल पोखरेललाई बाणगंगा नगरपालिकामा स्वागत गरिएको छ । हालै मात्र नियुक्त भएका पोखरेललाई विहीबार नगरका जनप्रतिनिधि, कर्मचारी र स्थानीयसमुदायले सम्मानपूर्वक स्वागत गरेका हुन् ।

स्वागत कार्यक्रममा पोखरेलले भूमि समस्या समाधानको कार्यलाई बाणगंगा नगरपालिकाबाट नै सुरु गरिने घोषणा गरे । उनका अनुसार अन्य पालिकाहरुमा पर्याप्त तयारी नभएकाले यो कार्यका बाणगंगाबाट नै हुने छ । पोखरेलले बाणगंगामा यसअघि भएका प्रगतिहरूका कारण यो सम्भव भएको उल्लेख गरे ।

पोखरेलले आयोगका अन्य सदस्यहरू अझै नियुक्त नभएका कारण कार्य अघि बढाउन ढिलाइ हुन सक्ने चिन्ता व्यक्त गरे । यद्यपि, उनले यस चुनौतीका बाबजुद समस्या समाधान कार्यलाई प्रभावकारी रूपमा अघि बढाउने प्रतिबद्धता जनाए । उनले भने “भूमि सम्बन्धी समस्या यस्तो रूपमा समाधान गरिनेछ, जसले आगामी दिनमा पुनः समस्या उत्पन्न नहोस् ।”

पोखरेलले स्पष्ट रूपमा निर्देशन दिएको उल्लेख गर्दै भने, “हामी यो समस्या समाधान गर्दा यस्तो व्यवस्था गर्नेछौं कि भविष्यमा यो समस्या दोहोरिन नपरोस् । दीर्घकालीन समाधानका लागि सबै पक्ष जिम्मेवार हुनुपर्छ ।” अध्यक्ष पोखरेलले सबै तहका जनप्रतिनिधि, कर्मचारी र स्थानीय समुदायलाई एकताबद्ध भएर यो महत्वपूर्ण कार्यमा सघाउन आह्वान गरे ।

कार्यक्रममा बाणगंगा नगरपालिकाका प्रमुख प्रशासकीय अधिकृत भक्तिराम मरासिनीले भूमि समस्या समाधानका लागि ९ हजार ७ सय ३३ निवेदन प्राप्त भएको जानकारी गराए । यी निवेदनहरूको समाधानका लागि आयोगले तीव्र गतिमा कार्य गर्ने योजना बनाएको छ ।

बाणगंगा नगरपालिकाका प्रमुख चक्रपाणि अर्यालले आयोगलाई हरसम्भव सहयोग गर्ने प्रतिबद्धता जनाउँदै भूमि समस्या समाधानले नगरवासीहरूको जीवनस्तरमा सकारात्मक परिवर्तन ल्याउने विश्वास व्यक्त गरे । उनले भने, “यो कार्यले नगरपालिकाको समग्र विकासमा नयाँ सम्भावनाको ढोका खोल्नेछ ।”

कार्यक्रममा स्थानीयवासीले भूमि समस्या समाधानका लागि तत्कालीन कदमहरू चाँडै चाल्न आग्रह गरेका थिए ।