खोज

बुटवल, ११ माघ ।

शुक्रबार विहानैदेखि अक्सफोर्ड मावि प्रांगणमा विद्यार्थी, अभिभावक, प्राध्यापकहरुको विशेष उपस्थिति थियो । होटल म्यानेजमेन्ट अध्ययरत विद्यार्थीहरुले विद्यालयमा आफुले सिकेका ज्ञान र सीपलाई ब्यवहारमा उतार्ने विशेष कार्यक्रम गरिएको थियो । दुई संस्करणसम्म देशभित्रका विभिन्न जातजातीका खाद्यान्नका परिकारहरुसहित फुड फेस्टिबल गरेका विद्यार्थीहरुले तेस्रो संस्करणमा भने अन्तराष्ट्रिय फुड फेस्टिभल गरे । जहाँ विद्यार्थीहरुले नेपाली, भारतिय, चाईनिज, इटाली, अमेरिका, मेक्सिको र इन्डोनेसियाका विशेष खानाका परिकारसंग त्यो देशकै संस्कृति झल्किने ड्रेसमा प्रस्तुत भएका थिए । सातवटा स्टलमा सात देशका नेपाली सेट, चिकेन बिरायनी, कुग पाओ चिकेन, फुसिली ईन टमाटो सस, क्रन्ची फ्राई चिकेन, क्युसाडिला, चिकन सटाय ओपन किचनमा विद्यार्थीहरुले पस्केका थिए ।

विद्यालय स्थापनाकालदेखि नै विद्यार्थीहरुको प्रतिभा प्रस्फुटन र रचनात्मक कार्यक्रमलाई जोड दिएर प्रयोगात्मक सिक्ने र सिकाउने वातावरण सिर्जना गर्दै आएको विद्यालयका प्राचार्य दिनेश भुसालले बताए । आफुहरुले शिक्षालाई सिप, प्रविधि, ब्यवहार र संस्कारसंग जोडेर अघि बढाएको उनले बताए । सात वटा स्टलमा सात देशका टिपिकल खानाका साथ संस्कृति झल्कने नृत्यहरु प्रस्तुति रहेको उनले बताए । कक्षा ११ र १२ का एचएमका विद्यार्थीहरु आफै पकाउने, पस्कने र खानाकै देशका संस्कृति झल्कने साजसज्जामा प्रस्तुत भएका थिए ।

एक दिने कार्यक्रममा ४ हजार दर्शक भित्रिने र १२ लाख रुपैया आम्दानी हुने र खर्चबाट बचेको रकम सामाजिक उत्तरदायित्वमा लगाईने उनले बताए । हस्पिटालिटि र टुरिजको सिकाईको साथ उद्यमशिलता विकास हुने गरि कार्यक्रम आयोजनामा जोड दिदै आएको उनले बताए । गतवर्ष आयोजना भएको कार्यक्रमबाट करीब २ लाख रुपैयाँ अनाथ आश्रमलाई सहयोग गरिएको उनले बताए ।

विद्यालयमा सिकेको ज्ञान र सीपको प्रयोगसँगै आम्दानीको ब्यवहारिक सिकाई यो कार्यक्रमबाट हुने प्राध्यापक सुमन भुसालले बताए । कार्यक्रममा विद्यार्थीहरूले नृत्य तथा गीतहरुका साथै अमेध्य ब्याण्डसहित विभिन्न ब्यान्डहरूले आफ्नो प्रस्तुती देखाएका थिए ।

कार्यक्रममा क्याम्पस प्रमुख मनोज मरासिनी, क्याम्पस अध्यक्ष अजित खनाल, दिप बोडिङ्ग स्कुलका प्राचार्य टिकाराम न्यौपाने,स्कलर्स होमका प्राचार्य बाबुराम बन्जाडे, नेपाल पत्रकार महासंघ रूपन्देहीका उपाध्यक्ष विश्वास ढकाल, ड्रिम ईन्टरनेश्नलका अध्यक्ष गोपाल राना, शाहील्याण्ड होटलका अध्यक्ष नहकुल शाही, बुटवल उपमहानगरपालिका शिक्षा शाखाका टिकाराम शर्मा, यादव पौडेल, विद्यालय ब्यबस्थापन समिति अध्यक्ष ललित खरेलले उदाहरणीय कार्यक्रम भएको बताए ।

विद्यालयका होटल म्यानेजमेन्टका प्राध्यापक उमंग पौडेल र विवेक न्यौपानेको सहजिकरणमा कार्यक्रम भएको कार्यक्रम संयोजक बालकृष्ण पोखरेलले बताए । हाल विद्यालयमा कक्षा ११ र १२ मा १५५० विद्यार्थीहरु अध्ययनरत रहेका छन् भने होटल म्यानेजमेन्ट पढ्ने विद्यार्थीहरु ४५० जना रहेका छन । अन्तर्राष्ट्रिय खाना महोत्सव कार्यक्रमबाट नाफा भएको रकम विद्यार्थीहरूले यसपटक पनि सामाजिक कार्यमा लगाईने प्राध्यापक सुमन भुसालले बताए ।