खोज

ढाका, ९ माघ।

बंगलादेशको हजरत शाहजलाल अन्तर्राष्ट्रिय विमानस्थलमा बम राखिएको धम्की प्राप्त भएपछि ६ घण्टाको आपत्कालीन स्थिति घोषणा गरिएको छ।

बिहान ५ः३० बजे विमानस्थल नियन्त्रण कक्षमा रोमबाट आउँदै गरेको बंगलादेश विमान एयरलाइन्सको बिजी ३५६ को विमानमा बम राखिएको सन्देश प्राप्त भएको थियो। सन्देशमा भनिएको थियो कि बम जुनसुकै बेला विस्फोट हुनसक्छ। यसको जानकारी तुरुन्तै उच्च अधिकारीहरूलाई पठाइएको थियो।

बमको धम्कीपछि क्याबका अध्यक्ष र कार्यकारी निर्देशक समूह क्याप्टेन कमरुल इस्लाम र अन्य वरिष्ठ अधिकारीहरू विमानस्थलमा पुगेका थिए। विमानस्थललाई तुरुन्तै व्यापक सुरक्षा घेरामा राखियो र वायुसेनाको बम डिस्पोजल टोली, क्विक रेस्पोन्स टिम (क्यूआरटी), फायर सर्भिस र अन्य कानून प्रवर्तन एजेन्सीहरू सुरक्षा कार्यमा संलग्न भए।

करिब २०० यात्रु र चालक दलका सदस्य सवार उक्त विमानले बिहान ९ः३५ बजे आपतकालीन अवतरण गरेको थियो। यात्रुहरूलाई सुरक्षित रूपमा बाहिर निकालिएको थियो र विमानको विस्तृत खोजी सुरु गरिएको थियो।

एचएसआइका उड्डयन सुरक्षा निर्देशक विंग कमाण्डर जहाँगिर हुसेनका अनुसार, विमान र दुईवटा शंकास्पद झोलाहरूको बम डिस्पोजल टोलीले गम्भीरताका साथ खोजी गरे पनि असामान्य बस्तु केही पनि फेला परेन।

बिहान ११:३० बजेसम्म केही नफेला परेकोले विमानस्थलको उडानको सामान्य सञ्चालनलाई दिउँसो पुनः सुरु गरिएको थियो।

अध्यक्ष मंजुर कबीर भुइयाले भने, “आजको अपरेसनले हाम्रो एयरपोर्ट सुरक्षा उपायहरूको बलियो प्रदर्शन गरेको छ। प्रत्येक सम्भावित खतरालाई अत्यन्त गम्भीरताका साथ व्यवहार गरिएको छ र हामी सुरक्षा जोखिमका लागि शून्य सहनशीलता कायम गर्न प्रतिबद्ध छौं।”