खोज

चन्द्रौटा (कपिलवस्तु), ८ माघ ।

९औं चन्द्रौटा कृषि, पर्यटन तथा औद्योगिक व्यापार महोत्सव–२०८१ को तयारी पूरा भएको छ। व्यापार संघ कपिलवस्तुको आयोजनामा “कृषि, पर्यटन, उद्योग र व्यापार: स्थानीय उत्पादनको प्रयोग, रोजगारको मुख्य आधार” भन्ने नाराका साथ महोत्सव आयोजना गरिएको हो। मंगलबार पत्रकार सम्मेलनमार्फत महोत्सवको तयारी पूरा भएको आयोजकले जनाएका छन्।

बुधबारबाट सञ्चालन हुने महोत्सवको उद्घाटन भूमि व्यवस्था, सहकारी तथा गरिबी निवारण मन्त्री बलराम अधिकारीले गर्ने जनाइएको छ। आर्थिक गतिविधिलाई चलायमान बनाउँदै पर्यटन प्रवद्र्धन गर्ने लक्ष्यसहित आयोजना गरिएको संयोजक महादेव पोख्रेलले जानकारी दिए। उनका अनुसार माघ ९ गते उद्घाटन हुने महोत्सवमा २ सय भन्दा बढी स्टल रहनेछन्।

महोत्सवमा कृषिजन्य उत्पादन, उद्योग, व्यापार, कला–संस्कृति, र शैक्षिक प्रदर्शनीजस्ता स्टल राखिनेछन्। स्थानीय उत्पादनलाई प्राथमिकता दिइएको महोत्सवमा कृषिजन्य सामग्रीको प्रतिस्पर्धा पनि हुनेछ। महोत्सवको उद्घाटनमा अहिले सम्मकै नमुना यात्रा आयोजना हुनेछ।

महोत्सवका मुख्य आकर्षणमा चन्द्रौटा डान्स आइडल, गायन प्रतियोगिता, आमा समूहस्तरीय डोरी तान प्रतियोगिता, राष्ट्रिय कलाकारको प्रस्तुती र दैनिक योग शिविर रहेका छन्। आयोजकले ३ लाखभन्दा बढी दर्शकले महोत्सव अवलोकन गर्ने लक्ष्य राखेका छन्।

स्थानीय कला, संस्कृति र जातीय पहिचान झल्काउने वस्तुका लागि निःशुल्क स्टलको व्यवस्था गरिएको स्टल संयोजक नवराज न्यौपानेले बताए। महोत्सवलाई व्यवस्थित र सफल बनाउन सञ्चार जगतको पूर्ण साथ रहने पत्रकार महासंघ कपिलवस्तुका सचिव सनिउल्ला धोवीले प्रतिबद्धता जनाए।

महासचिव गोपाल बन्जाडेले महोत्सवले आर्थिक, सांस्कृतिक, र सामाजिक गतिविधिलाई चलायमान बनाउन महत्त्वपूर्ण योगदान पुर्याउने विश्वास रहेको बताए। महोत्सव माघ २० सम्म गते सञ्चालन हुने बताउँदै विगतका महोत्सवभन्दा यतिबेलाको महोत्सवलाई फरकपन दिन खोजिएको उनको भनाइ छ।