खोज

 काठमाडौं।

भारतमा सम्पन्न पहिलो खो खो विश्वकपमा नेपाली पुरुष र महिला टोलीले ऐतिहासिक रजत पदक जित्न सफल भएका छन्। यो पहिलो पटक भएको खो खो विश्वकप प्रतियोगितामा भारतले पुरुष र महिला दुवै इभेन्टमा उपाधि जित्दा नेपाल दुवैमा उपविजेता बनेको थियो।

राष्ट्रिय खेलकुद परिषद् (राखेप) ले सोमबार एक सूचना जारी गर्दै नेपाली टोलीलाई बधाई दिएको छ। राखेपले नेपाली खेलाडीहरूले खो खो विश्वकपमा हासिल गरेको सफलता नेपाली खेलकुदका लागि ठूलो उपलब्धि भएको उल्लेख गर्दै सम्पूर्ण खेलाडी, प्रशिक्षक, टिम व्यवस्थापक र नेपाल खो खो संघलाई बधाई दिएको हो।

भारतको नयाँ दिल्लीमा पुस २९ गतेदेखि माघ ६ गतेसम्म भएको पहिलो खो खो विश्वकप प्रतियोगितामा नेपाली महिला र पुरुष टिमले प्राप्त गरेको सफलता नेपाली खेलकुदका लागि कोशेढुंगा साबित भएको राखेपले जनाएको छ।

नेपालको खो खो टिमले पहिलो पटक भएको विश्वकपमै ऐतिहासिक सफलता प्राप्त गर्दा यो खेलको चर्चा थप बढेको छ। यसअघि, नेपाली खो खो टिमले विभिन्न अन्तर्राष्ट्रिय प्रतियोगितामा उल्लेखनीय सफलताहरू हासिल गरिसकेको छ।

विगतमा १२औं दक्षिण एशियाली खेलकुद (साग) मा नेपालको पुरुष र महिला खो खो टिम दुवैले दोस्रो स्थान प्राप्त गरेका थिए। त्यस्तै, सन् २०१९ मा काठमाडौंमा भएको १३औं सागमा नेपाली महिला टिमले रजत पदक र पुरुष टिमले कांस्य पदक जितेका थिए।

यसैगरी, पहिलो, दोस्रो र तेस्रो एशियन खो खो च्याम्पियनशिपमा नेपालको दुवै टिम तेस्रो स्थानमा रहेका थिए भने चौथो एशियन खो खो च्याम्पियनशिपमा दुवै नेपाली खो खो टिम दोस्रो स्थानमा रहन सफल भएका थिए।