खोज

भर्जिनिया (अमेरिका¬) । अन्तर्राष्ट्रिय पत्रकार महासंघ अमेरिका (फिजा) को कार्य समितिको बैठक बिभिन्न निर्णय गर्दै सम्पन्न भएको छ ।

अनलाइन भिडियो कल प्रविधि मार्फत महासंघका अध्यक्ष रामप्रसाद खनालको अध्यक्षतामा बैठक बसेको हो । बैठकमा अमेरिकाका विभिन्न सहरहरू, नेपाल, क्यानाडा सम्मका सल्लाहकारहरू, पदाधिकारी तथा बोर्ड अफ डाइरेक्टरहरू  सबैको उपस्थिति रहेको थियो ।

बैठकमा सल्लाहकारहरू फिजाका सल्लाहकारहरु योगेश उपाध्याय, पुरुषोत्तम दाहाल, डा. बालकृष्ण चापागाईँ, पुरु घिमिरे र विजय घिमिरेले संस्था आगामी दिनमा कसरी अघि बढ्नु पर्छ र यसको भूमिका कस्तो हुने भन्ने बिषयमा आ–आफ्ना धारणा राखेका थिए ।

बैठकमा उपाध्यक्षहरू क्रमशः अखण्ड भण्डारी, जीवराम भण्डारी, केदार कोइराला, टङ्क पन्त, सतिश चापागाईँले पनि संस्थाका बहु आयामिक पक्षका बारेमा आ –आफ्ना धारणा राख्दै पत्रकारिताका क्षेत्रमा देखिएका विकृति विसङ्गति हटाउन अन्तर्राष्ट्रिय पत्रकार महासङ्घ, अमेरिकाले ठूलो भूमिका खेल्न सक्ने बताएका थिए ।

यसै गरी बैठकमा महासचिव टङ्क दाहाल, सचिव अनिल अधिकारी, बोर्ड अफ डाइरेक्टरहरू क्रमशः विश्व राज थापा, दिनेश कार्की, नवराज कुँवर, अनिल थापा, सुमन दाहालले पनि महासङ्घको गठनको औचित्य, यसका विविध पक्षहरूका बारेमा धारणा राखेका थिए ।

महासंघका अध्यक्ष रामप्रसाद खनालले बैठक उठेका विभिन्न प्रश्न, जिज्ञासाहरू लाई सम्बोधन गर्दै अन्तर्राष्ट्रिय पत्रकार महासङ्घ अमेरिकालाई पत्रकारहरूको अन्तर्राष्ट्रिय छाता सङ्गठन बनाउने गरी संस्थाले काम गर्नु पर्ने, पत्रकार र पत्रकारिता क्षेत्रका लागि स्वतन्त्र र निष्पक्ष ढङ्गले काम गर्ने उद्देश्य अनुरूप संसार भर विभिन्न देशहरूमा देश स्तरीय शाखाहरू स्थापना गर्ने तर्फ महासङ्घ अगाडि बढेको र अबका केही हप्तामै त्यसको सुरुवात नेपालमा नेपाल देश स्तरीय शाखा स्थापना गरी अभियान सुरु गर्न लागिएको जानकारी गराएका थिए ।

बैठकले सचिव अनिल अधिकारीलाई सदस्यता मापदण्ड बनाउन र आगामी बैठकमा प्रतिवेदन पेस गर्न जिम्मेवारी तोकेको छ । त्यस्तै बोर्ड अफ डाइरेक्टर दिनेश कार्कीलाई पत्रकारहरूको विश्वव्यापी नेटवर्क बनाउने कार्यलाई सहयोग पुग्ने गरी डाटा सङ्कलन गर्ने जिम्मेवारी दिएको छ ।

यसै गरी बैठकले  महासंघका अध्यक्ष खनाललाई कार्य समितिलाई पूर्णता दिन आवश्यक पर्ने थप मनोनयनहरू गर्न र नेपाल शाखा निर्माणका लागि आवश्यक पहल गर्न अधिकार प्रत्यायोजन गरेको छ ।
बैठकले पत्रकारिता सँग संम्वद्ध संसार भर रहेका जुनसुकै संस्थासँग पनि पत्रकार हक हित र पत्रकारिताको बिकासका लागि आश्यक सहकार्य गर्दै अगाडि बढ्ने पनि निर्णय गरेको छ ।

केही समय भित्रै नेपाल, बेलायत, अस्ट्रेलिया, जापान, क्यानाडा लगायतका देशहरूमा महासंघको  शाखा निर्माण गर्ने पनि बैठकले निर्णय गरेको छ ।

फिजाले नेपाली पत्रकारहरूलाई मात्र नभइ विभिन्न देशका पत्रकारहरूलाई समेट्दै जाने र जुनसुकै देशको पेशागत पत्रकार पनि यसमा आबद्ध हुन पाउने विधानमा व्यवस्था गरेको छ ।