खोज

बुटवल, ६ माघ । रुपन्देही सुपरलिग क्रिकेट प्रतियोगितामा ‘ए’ डिभिजनका खेलहरु सुरु भएका छन् । ऐतिहासिक नेपाल सुपर लिगका कारण रोकिएको जिल्लाका ‘ए’ डिभिजनका खेल शनिबारदेखी शुरु भएका हुन । यसअघि नै मंसिरमा ‘बी’ डिभिजनका खेलहरु सम्पन्न भएका थिए । सिद्धार्थनगरपालिकाको सहयोगमा रुपन्देही क्रिकेट संघको आयोजनामा शनिबार भएको उद्घाटन खेलमा वेष्टर्न क्रिकेट क्लब बुटवलले विजयी शुरुवात गरेको छ । लुम्बिनी खुकुरी क्लबलाई ४५ रनले पराजित गर्दै वेष्टर्नले विजयी सुरुवात गरेको हो ।

भैरहवास्थित सिद्धार्थ क्रिकेट मैदानमा भएको खेलमा टस हारेर ब्याटिङको निम्तो पाएको वेष्टर्नले ३२ ओभरमा ८ विकेट गुमाएर १ सय ३९ रनको मध्यम योगफल तयार गरेको थियो । वेष्टर्नका भुवन पाण्डेले २८, निरकुमार गुप्ता र अभिषेश गौतमले समान २०–२० तथा इशान पाण्डेले १६ र देव खनालले १२ रन बनाए । लुम्बिनी खुकुरीका शाहब आलम, अजयकुमार चौहान र शंकर रानाले २–२ तथा शेहजाद आलमले १ विकेट लिए । जवाफी ब्याटिङमा उत्रेको लुम्बिनी खुकुरी २८.३ ओभरमा केवल ९४ रनमा समेटियो । लुम्बिनीका शंकर रानाले सर्वाधिक २२ रन र निश्चल चौधरीले १६ रनबाहेक अन्य ब्याट्सम्यान क्रिजमा टिक्न सकेनन । खुकुरीलाई सस्तैमा रोक्न वेष्टर्नका सुझाव थापाले ७ ओभरमा २६ रन खर्चेर ५ विकेट लिए । इशान पाण्डेले २ तथा सन्देश थापा र अभिशेष गौतमले १–१ विकेट लिए । खेलमा सुझाव थापा प्लेयर अफ द म्याच घोषित हुदै पुरस्कृत भए ।

माघ २९ गतेसम्म चल्ने प्रतियोगिताको विजेता टिमले नगद १ लाख १ रुपैयाँ र उपविजेताले ५० हजार १ रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् । यस्तै, हरेक खेलको म्यान अफ द म्याचले १ हजार दुई सय, म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले जनही ५ हजार रुपैयाँ पाउने संघका कोषाध्यक्ष तथा खेल संयोजक निरजप्रताप खाँणले बताए । प्रतियोगितामा रुपन्देहीका ‘ए’ डिभिजनका १० टिमले भाग लिएका छन । आईतबार मेलबर्न क्रिकेट क्लब र जेआर क्रिकेट क्लब बिच खेल रहेको छ ।