खोज

बुटवल, ६ माघ । भैरहवामा जारी रुपन्देही सुपर लिग ‘ए’ डिभिजन क्रिकेट प्रतियोगिता अन्तरगत आइतबारको खेलमा मेलवर्न क्रिकेट क्लब (एमसीसी) ले विजयी भएको छ । मेलवर्नले जेआर क्रिकेट क्लबमाथि १० विकेटको शानदार जित निकालेको हो ।

सिद्धार्थ क्रिकेट मैदानमा मौसमका कारण ३२ ओभरमा छोट्याइएको खेलमा टस जितेर ब्याटिङ रोजेको जेआरले ३१ ओभर ५ बलमा सबै विकेट गुमाउँदै केवल ६२ रनको लक्ष्य खडा गरेको थियो । जेआरका विनय जिसीले १८ र कुशल भूर्तेलले १० रन बनाबाहेक अन्य ब्याट्सम्यानले दोहोरो अंक जोड्न सकेनन । कम स्कोरमा रोक्न मेलवर्नका विपिन आचार्यले ४ तथा रमेश कुर्मी, इकलाख अहम्मद वारिस र सन्दीप रजालीले समान २–२ विकेट लिए । झिनो लक्ष्य पछ्याएको मेलवर्नले ११.२ ओभरमा विना क्षति जित निकाल्यो । मेलबर्नको जितमा अमन खनालले अविजित २७ र आदित्य यादवले २१ रनको योगदान दिए । खेलमा विपिन आचार्य प्लेयर अफ दी म्याच घोषित भए ।

रुपन्देही क्रिकेट संघको आयोजनामा जारी प्रतियोगिताको विजेता टिमले नगद १ लाख १ रुपैयाँ र उपविजेताले ५० हजार १ रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् । यस्तै, हरेक खेलको म्यान अफ द म्याचले १ हजार दुई सय, म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले जनही ५ हजार रुपैयाँ पाउने संघका कोषाध्यक्ष तथा खेल संयोजक निरजप्रताप खाँणले बताए ।