खोज

बुटवल, ६ माघ । रुपन्देहीको सिद्धार्थनगर नगरपलिका सडकमा रहेका छाडा चौपाया व्यवस्थापनको कामलाई तिब्रता दिईएको छ । आफनो गौशाला नभएका शहरी पालिकाहरु छिमेकी पालिकासंग समन्वय गरेर छाडाचौपाया ब्यवस्थापनमा लागेका छन । कपिलबस्तुको बाणगंगा नगरपालिकाको समन्वयमा सिद्धार्थनगरले व्यबस्थापनको काम सुरु गरेको हो । शनिवार औपचारिक रुपमा नगरभित्रका छाडा चौपाया व्यवस्थापन अभियान सुरु गरिएको छ । ‘पहिलो दिन ५० भन्दा बढी छाडा चौपाया नियन्त्रणमा लिएका छौ ।’– सिद्धार्थनगर नगरपालिकाका प्रमुख प्रशाकिय अधिकृत जनक थापाले बुटवलटुडेलाई बताए । नियन्त्रणमा लिएका गाईगोरु कपिलबस्तु लैजाने तयारी भैरहेको उनले बताए । यसबिचमा कसैले आफनो भनी दावी गरेमा न्युनतम सात हजार जरिवाना लिए अर्कोपटक सडकमा नछोड्ने प्रतिबद्धतासहित फिर्ता गराइने उनले बताए ।

सडकमा छाडा गाईवस्तु बढ्न थालेपछि व्यस्थापनमा लागेको सिद्धार्थनगर नगरपलिकाका प्रमुख ईस्यिाक अहमद खाँले बताए । नगर क्षेत्रभित्र थारा, बेत बसेका वा दूध दिन छोडेका र बिरामी गाईगोरु बेवारिसे अवस्थामा छोडिदिने चलन बिकृतिको रुपमा लिएको उनले बताए । बजारका पसल, सडकमा गुड्ने गाडीदेखि बस्तीका किसानसम्मलाई छाडा चौपायाबाट समस्या भएपछि व्यस्थापन सुरु गरिएको उनले बताए । छाडा चौपाया व्यस्थापनको लागी अहिले अन्य पालिकासंग समन्वय गरिएको उनले बताए । ‘हामीले वडा नं ११ मा गौशाला निमार्ण गर्न लागेको पनि छौ ।’–उनले भने ।

गाईगोरु धनिहरुको कारण बजारमा छाडा चौपाया ब्यबस्थापन चुनौती बनेको सिद्धार्थनगर नगरपालिकाका प्रवक्ता एवं छाडाचौपाया व्यवस्थापन संयोजक भोला यादवले बताए । उनले छाडाचौपायाको ब्यवस्थापनलाई नियमित दिने बताए । अघिल्लो बर्ष भने पश्चिम नवलपरासीको एक गौशालाको समन्वयमा नगरपालिकाले छाडाचौपाया व्यस्थापन गरेको थियो ।