खोज

बुटवल, ०६ माघ ।
बिक्रम सम्वत २०८२ सालसम्म नेपाललाई सडक आश्रीत मानव मुक्त घोषणा गर्ने उद्देश्यका साथ स्थापित मानव सेवा आश्रमले रूपन्देहीको तिलोत्तमा ५ मणिग्राममा श्रीमद् भागवत सप्ताह ज्ञान–विज्ञान महायज्ञ आयोजना गर्ने भएको छ । आगामी सोमबारदेखि शुरुहुने महायज्ञमा ३ करोड रूपैयाँ संकलन गर्ने लक्ष रहेको महायज्ञ मुल आयोजक समितिले जनाएको छ ।
मानव सेवा आश्रमको तिलोत्तमा शाखाको स्तरोन्नति र अक्षयकोष श्रीवृद्धिका लागि हुन लागेको श्रीमद् भागवत सप्ताह ज्ञान–विज्ञान महायज्ञको बारे जानकारी दिन शनिबार पत्रकार सम्मेलनको आयोजना गरिएको हो । बिक्रम सम्वत २०८२ सालसम्म सडक आश्रीत मानव मुक्त नेपाल बनाउने महाअभियान अन्तर्गत मुलुकका बिभिन्न स्थानमा महायज्ञहरू संचालन गरिने आश्रमका संस्थापक अध्यक्ष रामजी अधिकारीले बताएका छन् ।
आश्रमलाई तन, मन, धनको त्रिवेणीबाट योगदान पु¥याउनु हुने सम्पूर्ण उदारमन दाताको लागि कृतज्ञ ज्ञापन गर्ने उद्देश्यले महायज्ञ आयोजन गर्न लागेको अध्यक्ष अधिकारीले जानकारी गराए । महायज्ञबाट ३ करोड रूपैयाँ संकलन गरिने लक्ष्य राखेको महायज्ञ मूल आयोजक समिति संयोजक लोकनाथ भुसालले पत्रकार सम्मेलनमा जानकारी दिएका छन् । संयोजक भुसालका अनुसार महायज्ञले अक्षय कोष श्रीवृद्धि गरी आश्रममा आश्रित सडक आश्रित मानवहरूको उचित व्यवस्थापनमा गर्न सघाउ पुग्नेछ ।
तिलोत्तमा–५ मणिग्राममा माघ ७ गतेदेखि १४ गतेसम्म सञ्चालन हुने महायज्ञमा भागवत भास्कर कमलनयन गौतमले निःशुल्क कथा वाचन गर्नु हुने कार्यक्रम रहेको संयोजक भुसालले बताए । भुसालका अनुसार साथै माघ ७ गते बिहान ८ बजे तिलोत्तमा शाखाको नवनिर्मित भवनको औपचारिक उद्घाटन लुम्बिनी प्रदेश सरकारका माननीय मुख्यमन्त्री चेतनारायण आचार्यले गर्नु हुने कार्यक्रम रहेको छ । महायज्ञ बिहान १० बजे शोभा कलश यात्राबाट सुरु भई दिउँसो १२ः३० बजे मुख्यमन्त्री आचार्यद्वारा समुद्घाटन हुने मानवसेवा आश्रमले जनाएको छ ।

शोभा कलश यात्रामा उपस्थिति जनाउने र ¥यालीमा उत्कृष्ट प्रदर्शन हुनेलाई प्रथम, द्वितीय र तृतीयको लागि उचित सम्मानको व्यवस्था गरिएको महायज्ञ मूल आयोजन समितिले जनाएको छ । मानव सेवा आश्रम रूपन्देही शाखाको रूपमा बुटवल उपमहानगरपालिका वडा नं ८ सुख्खानगरमा २०७४ सालदेखि संचालनमा छ । तिलोत्तमा नगरपालिका वडा नं ६ पश्चिम पहुनी मोक्षधाम सेवा आश्रमको परिसरमा निर्माण भएको भवनबाट विगत २ वर्षदेखि आश्रम सञ्चालनमा रहेको छ ।
तिलोत्तमा शाखाले हालसम्म १२ सय ५० जनाभन्दा बढी बेसहारा, असहाय, अपाङ्ग, मानसिक तथा शारीरिक रूपमा कमजोर मानिस, अभिभावक विहीन लगायत जीवन नै जोखिममा रहेका सहयोगापेक्षी सडक मानवहरूको लुम्बिनी प्रदेशका विभिन्न जिल्लाहरूबाट समेत उद्धार गरी सेवा प्रदान गरिसकेको छ । आश्रमले ३ सय १५ जनाको सुखद् पारिवारिक पुनर्मिलन गरिसकेको छ ।
महायज्ञ सफलता पूर्वक सम्पन्न गर्नका लागि १००१ जानाको मूल समारोह समिति निर्माण भएको छ भने सेवा सहजिकरणको लागि २६ वटा उपसमितिहरू निर्माण गरिएको छ । महायज्ञको संरक्षक परिवार र अभिभावक परिवारमा प्रदेश र जिल्लाका विभिन्न क्षेत्रका प्रमुख एवं प्रतिनिधिहरूलाई मनोनयन गरिएको छ । महायज्ञ सफल बनाउन र सेवा सहजीकरणको लागि मानवसेवा आश्रमको ७ प्रदेशका २० जिल्लामा रहेका २६ सेवाकेन्द्रहरूबाट ३० जनाभन्दा बढी कर्मचारी तथा अभियन्ताहरू सेवामा जुटिरहेका छन् ।