खोज

पाल्पा, २ माघ ।

तरकारीको उत्पादन र उत्पादकत्व वृद्धि गर्दै प्रशोधन केन्द्र स्थापना गरी उन्नत प्याकेजिङ गर्ने उद्देश्यले रुपन्देहीको कञ्चन गाउँपालिकामा तरकारीको मूल्य श्रृंखला परियोजना संचालन हुने भएको छ ।

कञ्चन गाउँपालिका, हेफर प्रोजेक्ट इन्टरनेशनल नेपाल, र सेतो गुराँस बालविकास सेवा रुपन्देहीबिच तरकारीको मूल्य श्रृंखला विकासका लागि नवीनतम विकास परियोजना सुरु गर्न त्रिपक्षीय सम्झौता भएको हो । सम्झौतामा कञ्चन गाउँपालिकाका अध्यक्ष नवराज ढकाल, हेफर नेपालका राष्ट्रिय निर्देशक डा.तिर्थराज रेग्मी, र सेतो गुराँस बालविकास सेवाकी कार्यबाहक अध्यक्ष उमा भण्डारीले हस्ताक्षर गरेका छन् । २६ महिनाको अवधि रहेको परियोजनाले तरकारी उत्पादन र उत्पादकत्व वृद्धि गर्ने र प्रशोधन केन्द्र स्थापना गर्दै उन्नत प्याकेजिङ र ब्रान्डिङ क्षमतासहित सञ्चालन गर्ने लक्ष्य राखेको छ । तरकारीको संकलन, प्रशोधन तथा बजारीकरण कञ्चन गाउँपालिकाभित्र रहेको कृषि सहकारीमार्फत संचालन हुनेछ ।

हेफर नेपालका राष्ट्रिय निर्देशक डा.तिर्थराज रेग्मीले परियोजना मार्फत तरकारी उत्पादन गर्ने किसानहरूको समूह गठन र सुदृढीकरण गरी उत्पादन र उत्पादकत्व वृद्धि गर्ने उल्लेख गरे । रेग्मीले गुणस्तरीय र वातावरणमैत्री उत्पादन सुनिश्चित गर्न दिगो र बजारमुखी उत्पादन विधिहरूमा जोड दिइने बताए । कञ्चन गाउँपालिकाका अध्यक्ष नवराज ढकालले गाउँपालिकाभित्रका कृषकहरुको आम्दानी बृद्धि गराउन परियोजना संचालन गर्न लागिएको बताए ।

यो परियोजनाले कञ्चन गाउँपालिकामा दिगो कृषि अभ्यासहरू एकीकृत गर्दै उत्पादन वृद्धि र बलियो बजार जडानमार्फत तरकारी खेतीमा परिवर्तन ल्याउनेछ । किसानहरूले जलवायु स्मार्ट प्रविधि र बजारमुखी उत्पादन विधिहरू अपनाएर ताजा र प्रशोधित तरकारीको भरपर्दो आपूर्ति सुनिश्चित गर्न सक्षम हुनेछन् । प्रशोधन केन्द्रले मूल्य अभिवृद्धिका लागि केन्द्रको रूपमा कार्य गर्दै किसानलाई प्रतिफल र उपभोक्तालाई गुणस्तरीय उत्पादन प्रदान गर्ने जनाइएको छ ।