खोज

गोरखा, २ माघ ।

जिरकोट गाउँपालिकाका अध्यक्ष दीपक देवकोटाले ‘एक सहकारी, एक उत्पादन’ अभियानमार्फत स्थानीय विकास र आत्मनिर्भरतालाई नयाँ गति दिने योजना प्रस्तुत गरेका छन्।

आदर्श बहुउद्देश्यीय सामुदायिक विकास सहकारी संस्थाको १९औं वार्षिक साधारण सभा र छैटौं अधिवेशन उद्घाटन गर्दै उनले सहकारीलाई ग्रामीण विकासको आधार बनाउँदै उत्पादनमूलक व्यवसाय र स्थानीय रोजगारी सिर्जनामा केन्द्रित गरिने बताए।

अध्यक्ष देवकोटाले सहकारीलाई जनताको साझा संस्था मान्दै यसलाई आर्थिक उन्नति गर्ने अभियानका रूपमा अघि बढाउने योजनाको पुष्टि गरेका छन्। उनले भने, “सहकारीलाई नमुना रूपमा विकास गर्दै, स्थानीय उत्पादनहरूको ब्रान्डिङ र बजारीकरणमा जोड दिनेछौँ।”

गाउँपालिकाले स्थानीय उत्पादनमा आधारित विभिन्न कार्यक्रमहरू – जस्तै कोदाको रक्सी, किवी खेती, ओलाङमा होमस्टे सञ्चालन र उत्पादनमूलक व्यवसाय प्रवर्द्धन गर्न सहकारीमार्फत अनुदान उपलब्ध गराउने योजना अघि सारेको जनाएको छ। यसले रोजगारी सिर्जना मात्र नगरी, उत्पादन गरिएको सामग्रीलाई राष्ट्रिय र अन्तर्राष्ट्रिय बजारमा पुर्याउन मद्दत पुर्‍याउने विश्वास व्यक्त गरिएको छ।

अध्यक्ष देवकोटाले सहकारीप्रति जनतामा रहेको नकारात्मक धारणा सुधार्ने आवश्यकता औँल्याए। उनले कडा नीति अवलम्बन गर्दै सहकारी व्यवस्थापन सुधार्न गाउँपालिकाले कदम चाल्ने र खराब कर्जाका सहकारीलाई अनुशासनमा ल्याउने प्रतिबद्धता जनाए।

कार्यक्रममा उनले नम्कि-भिरकुना-खरिबोट- वडा कार्यालय सडक पिच गर्ने र स्थानीय स्तरमा उत्पादित हाइड्रोलाई केन्द्रीय प्रसारण लाइनमा जोड्न सहजीकरण गर्ने प्रतिबद्धता पनि जनाए।

२०६३ सालमा स्थापना भएको आदर्श बहुउद्देश्यीय सामुदायिक विकास सहकारी संस्थाले अहिले ११ वटा साना सहकारी संस्थाहरूलाई मातहत राख्दै ३ करोड रुपैयाँको लगानी गरेका स्थानीय शेयर सदस्यहरूलाई प्रत्यक्ष फाइदा पुर्‍याइरहेको छ।