खोज

बुटवल, २ माघ ।

कपिलवस्तु महाराजगञ्जका मोहम्मद जमसा फकिर हालै नेपाल प्रहरीको जवानको परीक्षामा उत्तीर्ण हुन सकेकोमा प्रसन्न छन् । उनले महाराजगञ्जस्थित सेतो गुलाब नामक सामाजिक संस्थाबाट प्रहरी जवान जाँचका लागि निःशुल्क पूर्व अभ्यास तालिम लिएका थिए ।

त्यसैगरी महाराजगञ्जकै आशिष गडेरिया पनि प्रहरी जवान परीक्षामा उत्तीर्ण भएकोमा प्रसन्न छन् । उनले पनि सेतो गुलाब संस्थाबाट पूर्व अभ्यास तालिम लिएका थिए । ‘सेतो गुलाब संस्थाले दिएको निःशुल्क पूर्व अभ्यास तालिमले हामीलाई परीक्षा उत्तीर्ण गर्न सघाउ मिल्यो’ मोहम्मद जमसा फकिर र आशिष गडेरियाले प्रसन्न मुद्रामा भने । विपन्न वर्गका आफूले सरकारी सुरक्षा अङ्गमा रोजगारीमा प्रवेश पाएकोमा खुसी लागेको उनीहरुले बताए । मोहम्मद जमसा फकिरले ४३ औँ स्थानमा र आशिषले ३३३ औँ स्थानमा नाम निकाल्न सफल भएका थिए ।

एक वर्षअघि स्थापित सेतो गुलाब संस्थाले कपिलवस्तुको विशेष गरी महाराजगञ्ज ईलाकालाई लक्षित गरी विपन्न, पिछडिएका र सिमान्तकृत वर्गका युवालाई स्वदेशमै रोजगारीमुलक काम गर्न सन्देश प्रवाह गर्दै आएको छ । त्यस क्रममा पहिलो चरणमा राष्ट्रिय सु्रक्षा अङ्ग नेपाल प्रहरी र सेनामा भर्तीका लागि निःशुल्क पूर्व अभ्यास तालिम सञ्चालन गरिएको संस्थाका अध्यक्ष एंव नेपाल प्रहरीका पूर्व वरिष्ठ उपरीक्षक विक्रम सिंह थापाले बताए ।

थापाका अनुसार उक्त संस्थाले महाराजगञ्ज क्षेत्रका विपन्न, पिछडिएका र सिमान्तकृत वर्गका युवाहरुलाई नेपाल प्रहरीको जवानमा भर्नाका लागि पाँचदिने निःशुल्क अभ्यास तालिम प्रदान गरेको थियो । पूर्व अभ्यास तालिमपछि संस्थाले लिएको परीक्षामा उत्तीर्ण भएका ११ जना सबै युवा नेपाल प्रहरीको परीक्षामा पनि उत्तीर्ण भएका छन् । राष्ट्रिय सुरक्षा अङ्गमा मधेशी समुदायको सहभागिता न्यून रहेको बताउँदै पूर्व एसएसपी थापाले यसमा सुधार ल्याउनपर्ने बताए ।

मु्लुकमा रोजगारीको अवसर नभएको भन्दै युवाहरु दिनहुँ विदेश पलायन भैरहेको अवस्थामा सुधार ल्याउँदै स्वदेशमै युवालाई रोजगारीमा लगाउन आफूले नागरिकस्तरबाट पहल थालेको थापाको भनाई छ । सेना, सशस्त्र प्रहरी र नेपाल प्रहरीमा भर्नाका लागि निःशुल्क तालिम प्रदान गर्ने कार्यक्रम थापाले बनाएका छन् । अन्य सिपमूलक र स्वरोजगारमूलक तालिमका लागि पनि सम्बन्धित संस्था र निकायसँग समन्वय गरी ग्रामीण पिछडिएका वर्गको जीवनस्तर उकास्नका लागि टेवा पु्याउने कार्यक्रम बनाएको जानकारी समेत थापाले दिएका छन् ।