खोज

सैनामैना, १ माघ ।

रुपन्देहीको सैनामैना नगरपालिका–४, राधाकृष्ण मन्दिर उधान परिसरमा श्रीमदभागवत कथा ज्ञान महायज्ञ एवं श्रृंगारिक महाआरती सुरु भएको छ ।

मन्दिर उधानमा आध्यात्मिक ध्यान केन्द्र निर्माण गर्ने उद्देश्यले राधाकृष्ण मुर्ति प्राणप्रतिष्ठा तथा श्रीमदभागवत कथा ज्ञान महायज्ञ एवं श्रृंगारिक महाआरती सोमबारदेखि सुरु भएको छ भने राधाकृष्ण मन्दिरमा जिर्ण बनेको मुर्तिको विधिपुर्वक प्राण प्रतिष्ठा गरिएको छ ।

आध्यात्मिक ज्ञान जिवनमा कार्यान्वयन गर्न सकियो भने जीवनलाई थप सार्थक बनाउन सकिने सैनामैना नगरपालिकाका प्रमुख फणेन्द्र प्रसाद शर्माले बताए । श्रीमद्भागवत कथा ज्ञान महायज्ञको उद्घाटन गर्दै नगर प्रमुख शर्माले आधुनिक जिवनशैलीमा देखिएको भयावह मानसिक स्वास्थ्य सुधारका लागि ज्ञान, ध्यान र योगले ठुलो योगदान पुर्याउने जिकिर गरे ।

महायज्ञको माध्यमबाट धर्म, संस्कार र संस्कृतिको रक्षा गर्नुका साथै समाजमा रहेका विकृति विसङ्गति हटाउन धार्मिक कार्यक्रमले महत्त्वपूर्ण भुमिका खेल्ने भन्दै नगरले भौतिक विकाससंगै मानवीय विकासमा जोड दिएको बताए ।

अन्तर्राष्ट्रिय योग प्रशिक्षक ऋषिराम न्यौपानेले शारिरिक स्वस्थ्य र मानसिक स्वास्थ्यको लागि योग एक महत्त्वपूर्ण पक्ष रहेको बताए । उनले भने, पछिल्लो समय मानसिक रोग सम्बन्धि स्वास्थ्य समस्या बढ्दो छ । मानिस शारीरिक, मानसिक, सामाजिक तथा आध्यात्मिक रूपमा स्वास्थ र सन्तुलित हुनुपर्छ र यो सबै योगकै माध्यमबाट सम्भव रहेकाले युवापुस्ता बालबालिका एवं सबैवर्गमा योग शिक्षाको आवश्यकता औंल्याए ।

माघे संक्रान्तिबाट देवताहरुको उदय र जागृत हुने समयमा रहेकाले विभिन्न पुजा, अनुष्ठ शुभाकार्य गर्ने उत्तम साइतमा मन्दिरमा मुर्ति स्थापना र महायज्ञ संचालन गरिएको प्रमुख कथाबाचक आचार्य विष्णुप्रसाद ज्ञवालीले बताए । उनले महायज्ञ जस्ता धार्मिक गतिविधिलाई बढाएर समाजलाई अनुशासित, नैतिकवान् बनाउनेतर्फ जानुपर्ने जोड दिए ।

समाजलाई सभ्य, सुसंस्कृत र समृद्ध बनाउन महायज्ञले महत्त्वपूर्ण भुमिका खेल्ने सैनामैना–४ का अध्यक्ष रामप्रसाद अधिकारीले बताए । महायज्ञलाई सफल बनाउन सबैको साथ र सहयोथको खाँचो रहने बताउँदै वडाको विकासको लागि आफू प्रतिबद्ध रहेको जनाए ।

महायज्ञ आयोजक मूल समारोह समितिका संयोजक रामप्रसाद गौतमले धार्मिक, सांस्कृतिक र आध्यात्मिक चेतना जागृत गराउने उद्देश्यले महायज्ञ आयोजना गरिएको बताए ।

महायज्ञको पूर्वसन्ध्यामा बिहान विभिन्न आमा समुह, टोल विकास समिति, संघ संस्थाको सहभागितामा झाँकी सहित शोभा कलशयात्रासहित मुर्गिया परिक्रमा गरिएको थियो ।

महायज्ञको औपचारिक कार्यक्रममा महायज्ञ आयोजक मूल समारोह समितिका संयोजक रामप्रसाद गौतम, समितिका महासचिव लालप्रसाद पंगेनी कृष्णलगायतले महायज्ञ गर्नुको उद्देश्यबारे प्रकाश पारेका थिए ।

महायज्ञकै अवसरमा ध्यान तथा योग प्राणायाम, सामूहिक पुजा, मेरो स्वास्थ्य मेरो जिम्मेवारी बिषयक विद्यार्थी लक्षित प्रवचन, हरेक दिन श्रीमदभागवत कथा बाचन र साँझमा महाआरती र भजन किर्तन हुनेछ ।

महायज्ञमा प्रमुख कथाबाचक आचार्य विष्णुप्रसाद ज्ञवालीको संगितमय शैलीमा प्रवचन भइरहेको छ। माघ १ गतेदेखि सुरु भएको श्रीमद् भागवतमहायज्ञ यही माघ ७ गतेसम्म चल्नेछ ।