खोज

बुटवल, २९ पुस । बजारमा ब्यवसायीहरुको माग अनुसार सरकारले सुन वितरण नगरेर विभेद गरेको एक कार्यक्रममा बोल्ने बक्ताहरु गुनासो गरेका छन । बुटवल सुनचादी व्यवसायी संघको चौथौ र पाँचौ साधारणसभा तथा दोस्रो अधिवेशनमा सोमबार बोल्ने बक्ताहरुले सुन वितरणमा रहेको विभेद अन्त्य गर्न सबै व्यवसायी एक हुनुपर्ने समेत आग्रह गरे ।

कार्यक्रमको उद्घाटन गर्दै नेपाल सुनचाँदी व्यवसायी संघका केन्द्रीय अध्यक्ष अर्जुन रसाइलीले सुनचादी व्यवसायीलाई सरकारबाट अत्याचार गरेको आरोप लगाए । व्यवसायिक एकता बलियो भएमात्र समाधान हुने तर्क दिदै उनले सुनचाँदी व्यवसायीहरु अब नयाँ तरिकाबाट अघि बढन जरुरी रहेको बताए । व्यवसायमा रहेको समस्या समाधान गर्न वर्तमान नेतृत्व इमानदार रहेर लागेको बताउदै उनले सुन वितरणको समस्या समाधान गर्ने प्रतिवद्धता जनाए । सुन वितरणका लागि नयाँ कार्यविधि बन्दै गरेको जानकारी गराउदै उनले महासंघ १४ बुँदे माग प्रस्ताव सरकारलाई दिएको बताए । नेपाली बजारका लागि दैनिक ४० किलो सुन खपत हुँदै आएको बताउदै बैक मार्फत सुन वितरण दिने गरेको जानकारी दिए । राज्यले लिएका नीति व्यवसायीले पालना गर्नुपर्ने बताउदै त्यसको लागि राज्यले नीति पनि व्यवसायीमैत्री हुनुपर्ने बताए ।

कार्यक्रममा नेपाल सुनचाँदी व्यवसायी महासंघ गण्डकी प्रदेश सभापति चन्द्र किशोर गौतम, लुम्बिनी प्रदेश सभापति धुर्व कुमार गहतराज, केन्द्रीय सदस्यहरु चेत नारायण विश्वकर्मा, दिपक कुमार स्वर्णकार, राजेन्द्र सुनार, बुटवल उपमहानगरपालिका कार्यपालिका सदस्य यम बहादु सुनार, निवर्तमान केन्द्रीय सदस्य तथा दैनिक लुम्बिनी पत्रिकाका सल्लाहकार एमबि विश्वकर्मा लगायतले ब्यवसायीहरुको हकहितमा संस्थागत एकताको आवश्यकता बारे प्रकाश पारे । कार्यक्रममा बुटवल सुनचाँदी व्यवसायी संघका अध्यक्ष गकुल विश्वकर्मा, सचिव चुरामणी बिक, सहसचिव कृष्ण सुनारले रुपन्देहीमा ब्यवसायीको समस्या र वर्तमान अवस्थामा अप्नाएका संस्थागत प्रगतिका बारेमा प्रकाश पारे ।